'कांग्रेस सरकारमा भएको कारण मात्र भनेको होइन, ओलीजीले साँच्चै राम्रो काम गर्नुभएको छ'
काठमाडौं : नेपाली कांग्रेसका सभापति शेरबहादुर देउवाले ओली सरकारले सय दिनमा राम्रो काम गरेको बताएका छन्।
शनिबार शुभकामना आदानप्रदान तथा जय नेपाल भक्तपुर स्मारिका लोकार्पण कार्यक्रमलाई सम्बोधन गर्दै देउवाले अझै ओली सरकारले राम्रो काम गर्नेमा आफू विश्वस्त रहेको बताए।
उनले भने, ‘सय दिन बल्ल पुगेको छ, ओलीजीको प्रधानमन्त्री कार्यकालको। यहाँ मात्र होइन जहाँ पनि सय दिनको कामको सम्बन्धमा आलोचना प्रत्यालोचना सबै हुन्छ। हाम्रो समग्र सरकार छ। हामी सरकार भएको कारण मैले उहाँलाई भनेको होइन, साँच्चै राम्रो काम गर्नुभएको छ। मलाई विश्वास छ। अझै यस्तै राम्रो काम गर्नुहुने छ।’
उनले प्रजातन्त्रमा आलोचना हुनु स्वभाविक कुरा हुने बताए।
‘अरू पार्टीहरूले उहाँलाई आलोचना गरेका छन्। त्यो आलोचनाहरू पनि तथ्यपरक भएर सरकारले ध्यान दिने छ। म पनि ओलीजीलाई प्रोत्साहन गर्ने छु, उनले थपे।
उनले यो देश ठूला दुई देशको बीचमा रहेकाले प्रधानमन्त्री ओलीले सबै कुरा ध्यानमा राखेर हरेक क्रियाकलापहरू गर्न सक्षम हुने बताए।
आलोचनालाई पनि गम्भीरताका साथ लिएर अहिलेको सरकारले परिणाममुखी काम गरेर देखाउनुपर्ने सभापति देउवाको तर्क छ।
कात्तिक १७, २०८१ शनिबार १४:१८:५२ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
