आईसीसी विश्वकप लिग-२ मा अमेरिकासँग खेल्दै नेपाल

काठमाडौं : आईसीसी क्रिकेट विश्वकप लिग-२ मा नेपालले आज घरेलु टोली अमेरिकासँग खेल्दैछ।

टेक्सासको ग्रान्ड प्रेरी क्रिकेट स्टेडियममा खेल नेपाली समय अनुसार राति सवा नौ बजे शुरू हुनेछ।

लिग टूमा हालसम्म निराशाजनक प्रदर्शन गरे पनि यसै त्रिकोणात्मक सिरिजको दोस्रो खेलमा नेपालले बलियो टोली स्कटल्यान्डलाई पाँच विकेटले हराउँदै पुनः लयमा फर्किएको छ।

तर, यस सिरिजको पहिलो खेलमा नेपाललाई अमेरिकाले तीन विकेटले पराजित गरेको थियो। नेपाल सोही हारको बदला लिने लक्ष्यमा हुनेछ।

यस सिरिजअघि नेपालले अमेरिकाविरुद्ध उसकै मैदानमा ३ खेलको टी–ट्वेन्टी आई सिरिज क्लिन स्विप गरेको थियो।

दुई टोलीबीच हालसम्म खेलिएका आठ ओडीआईमा नेपालले ४ र अमेरिकाले ३ खेल जितेको छ। एक खेल बिना नतिजा समाप्त भएको छ।

लिग-२ अंक तालिकामा नेपाल सातौं स्थानमा छ। टोलीले १० मध्ये २ खेल जित्दै ५ अंक जोडेको छ। अमेरिका ११ खेलमा ७ जितसहित १४ अंक जोडेर तालिकाको दोस्रो स्थानमा छ।

कात्तिक १६, २०८१ शनिबार ०७:४२:४६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।