निर्माण पक्ष भन्छ- बाउ र छोराको इमोसनको कथा हो ‘पूर्ण बहादुरको सारङ्गी’
काठमाडौं : चलचित्र ‘पूर्ण बहादुरको सारङ्गी’को निर्माण टिमले मौलिक कथा तथा संस्कृति र पेसा पुस्तान्तरणको कथा नै ‘पूर्ण बहादुरको सारङ्गी’को स्ट्रङ पक्ष भएको बताएको छ।
काठमाडौंमा पत्रकार सम्मेलन गर्दै निर्माण टिमले चलचित्र ‘पूर्ण बहादुरको सारङ्गी’ले गन्धर्व समुदायको कथा भन्दै छोराका लागि बाउले देख्ने सपनाको कुरा गर्ने बताएको छ।
‘यो चलचित्रले पुस्तान्तरणसहितको रुपान्तरण यो सिनेमाको कथा सार हो। बाउले छोराका लागि देखेको सपनाको कथा हो यो सिनेमा,’ सिनेमाका मुख्य कलाकार विजय बरालले भने, ‘सिनेमा भन्नबित्तिकै केही कथा हुनुपर्छ, यो सिनेमाले भन्ने पनि यही नै हो।’
उनले आफ्ना लागि सिनेमा विशेष रहेको बताए। क्यारेक्टर र जिम्मेवारीका हिसाबले आफ्ना लागि ‘पूर्ण बहादुरको सारङ्गी’ अवसर पनि भएको उनको भनाइ छ।
चलचित्रका अर्का कलाकार मुकुन भुसालले सिनेमाप्रति दर्शकको चासो रहेको बताए। काठमाडौं बाहिरको टुरमा पनि सिनेमाप्रति दर्शकको उत्साह देखिएको उनले बताए।
‘दर्शकको चासो देख्दा हामी उत्साही छौँ। यो चलचित्र दर्शकका लागि नयाँ एक्सपिरियन्स पनि हुनसक्छ। आफ्नो करिअरमा पनि केही योगदान गर्नेमा म ढुक्क छु,’ उनले भने।
अञ्जना बराइलीले सिनेमाबारे मोफसलमा निकै राम्रो हाइप बनेको बताइन्। काँधे कुरी गीतबाट दर्शकले ‘पूर्ण बहादुरको सारङ्गी’का बारेमा धेरै कुरा थाहा पाइसकेको उनको भनाइ छ।
निर्माता प्याट्रिक सुवेदीले नेपाल बाहिरका दर्शकमा ‘पूर्ण बहादुरको सारङ्गी’लाई लिएर प्रतीक्षा रहेको बताए। आफू देशबाहिर रहँदा यो सिनेमालाई लिएर निकै धेरै प्रतीक्षा र इन्क्वाइरी रहेको उनले सुनाए।
निर्देशक सरोज पौडेलले आम बुवाहरू जसले आफ्नो सन्तानका लागि सपना देख्छन् उनीहरुको कथा ‘पूर्ण बहादुरको सारङ्गी’ले भन्ने बताए। सन्तानका लागि सपना देख्ने र संघर्ष गर्ने बुवाहरूको कथामा यो सिनेमा बनेको उनले प्रष्ट पारे।
‘बाउ र छोराको इमोसनको कथा हो। यो सिनेमाले बाउ र छोरोबीचको इमोसनको कथा भनिरहँदा दर्शकको चित्त बुझाउँछ,’ उनले भने।
आफू पहिलोपटक मुख्य भूमिकामा रहँदा केही फरक अनुभव र जिम्मेवारीमा रहेको विजज बताउँछन्।
‘सधैँ छेउमा बसेर काम गरिरहेको अहिले आफैँ अगाडि लागेर काम गर्दा केही गाह्रोजस्तो भइरहेको छ। तर यो मेरो जिम्मेवारी हो। यसले मलाई फाइदा पनि गरिरहेको छ ’उनले भने।
मिडल एजको क्यारेक्टर गर्न असहज नभए पनि बृद्धअवस्थाको क्यारेक्टर गर्न भने सुरुमा केही असहज भएको उनले स्मरण गरे।
अभिनेता मुकुन भुसालले कुन रोल र स्क्रिन टाइम कति भन्ने कुराले अर्थ नराख्ने बताए। सर्पोटिङ क्यारेक्टरमा पनि आफूले सिनेमा गरेको भन्दै राम्रो र अर्थपूर्ण क्यारेक्टर भएको अवस्थामा छोटो रोलले पनि केही फरक नपर्ने उनको भनाइ छ।
आफूले लिड रोलमा केही चलचित्र गरे पनि आफ्नो ठूलो स्टारडम छ भन्ने भ्रममा आफू नरहेको उनले बताए।
निर्माता पौडेलले सुरुमा वानलाइन कथा सुन्दै यसमा सिनेमा बनाएर दर्शकलाई भन्नुपर्छ भन्ने लागेको सुनाए।
सरोज पौडेलको कथा तथा निर्देशन रहेको चलचित्रको संवाद महेश दवाडीले लेखेका छन्।
निर्माता विनोद पौडेल, प्याट्रिक सुवेदी हुन्। कार्यकारी निर्मातामा रमेश चौलागाईं, हरि श्रेष्ठ र रमेश ढकाल छन्।
चलचित्र तिहारको छेको पारेर कात्तिक १५ बाट रिलिज हुँदैछ छ।
कात्तिक १२, २०८१ सोमबार २०:४७:१९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
