बलात्कार आरोपी सशस्त्र प्रहरी जवान हिरासतमा झुन्डिएको अवस्थामा भेटिए
बुटवल : बालिका बलात्कारको आराेपमा पक्राउ परेका शसस्त्र प्रहरी जवान रेवन पचभैया मगरले प्रहरीकाे हिरासत कक्षमा झुन्डिएको अवस्थामा मृत भेटिएका छन्।
गत असाेज २४ गते दाङकाे भालुवाङमा बालिका बलात्कार आराेप लागेका सशस्त्र प्रहरी जवान मगर सोमबार बिहान वडा प्रहरी कार्यालय घोराहीकाे हिरासत कक्षकाे शाैचालयमा मृत अवस्थामा भेटिएका हुन्।
प्यूठानकाे बडडाँडा घर रहेका सशस्त्र प्रहरी बल ज्वालामाई गण २९ नम्बर हेटक्वाटर भालुवाङमा कार्यरत सशस्त्र प्रहरी जवान मगर शौचालयमा झुन्डिएको अवस्थामा मृत भेटिएको जिल्ला प्रहरी कार्यालय दाङका डिएसपी ईश्वर थापाले जानकारी दिए।
उनले भने, ‘बिहान करिब ५ बजे झुण्डिएकाे अवस्थामा शव फेला परेको हो, टिसर्टको पासो थियो।’
आरोपी मगरसहित अर्का एक जनालाई पनि केही दिनअघि प्रहरीले पक्राउ गरी दाङ-देउखुरी जिल्ला अदालतमा सात दिनकाे म्याद थप गरेर अनुसन्धान अघि बढाएकाे थियाे।
कात्तिक १२, २०८१ सोमबार ०९:२७:३९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
