शेखर कोइरालाले भने 'सरकार ढल्दैन, विपक्षी दलहरूले धेरै सपना नदेखुन्'
काठमाडौं : नेपाली कांग्रेसका नेता शेखर कोइरालाले वर्तमान सरकार ढल्ने कुनै सम्भावना नरहेको दाबी गरेका छन्। सरकार ढल्छ कि भनेर सपना नदेख्न विपक्षी दलहरूलाई उनको सुझाव छ।
मोरङको बेलबारीमा नेपाल भूतपूर्व सैनिक संघ मोरङको प्रथम जिल्ला अधिवेशन समारोहलाई सम्बोधन गर्दै नेता कोइरालाले राजनीतिक स्थिरता, आर्थिक विकास र सुशासन कायम गर्ने लक्ष्यका साथ निर्माण भएको सरकार ढल्ने सम्भावना नरहेको बताए।
आगामी निर्वाचनसम्म कांग्रेस र एमालेको गठबन्धनकै सरकार रहिरहने बताउँदै नेता कोइरालाले भने, 'यो सरकार ढल्दैन, चल्छ। यद्यपि, मन्त्रीहरूले इमान्दारीपूर्वक काम गर्नुपर्दछ। जनतालाई सरकार भएको अनुभूति दिनुपर्दछ।'
कोइरालाले राजनीतिक स्थिरता, आर्थिक विकास र सुशासनका लागि देशका सबैभन्दा ठूला दल कांग्रेस र एमालेको सरकार बनेको उल्लेख गरे।
उनले भने, 'यो सरकार बनेको धेरै भएको छैन।'
सुशासन कायम गर्न सरकार निर्ममरूपमा प्रस्तुत हुनुपर्नेमा जोड दिँदै उनले कांग्रेस र एमालेको बलले मात्रै संविधान संशोधन नहुने भएकाले सबैले मिलेर अगाडि बढ्नुपर्नेमा जोड दिए। नेता कोइरालाले अन्य दललाई पनि विश्वासमा लिएर संविधान संशोधन गर्नुपर्नेमा जोड दिए।
'संविधान संशोधन छुट्टै आयोग बनाएर हुन्छ कि संसदीय समिति बनाएर हुन्छ, सबै दलको सहमतिमा गर्नुपर्दछ,' उनले भने।
कात्तिक ३, २०८१ शनिबार २१:१०:५९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
