नेपाली क्रिकेट टोलीको मेन्टरमा दासानायके नियुक्त

काठमाडौं : नेपाल क्रिकेट संघ (क्यान) ले नेपाली राष्ट्रिय क्रिकेट टोलीका पूर्वप्रशिक्षक पुबुदु दासानायकेलाई नेपाली टोलीको मेन्टर नियुक्त गरेको छ।
    
आइसिसी विश्वकप क्रिकेट लिग-२ अन्तर्गत यही कात्तिक ९ देखि १९ सम्म सञ्चालन हुने त्रिकोणात्मक शृङ्खलामा अमेरिका, नेपाल र स्कटल्यान्डबीच प्रतिस्पर्धा हुनेछ। 

त्यस शृङ्खलाका लागि पूर्वप्रशिक्षक दासानायकेलाई मेन्टरको भूमिका निर्वाह गर्ने गरी मनोनयन गरिएको क्यानका प्रवक्ता छुम्बी लामाले जानकारी दिए। 

पूर्वप्रशिक्षक दासानायकेले त्यस प्रतियोगिता अवधिभर नेपाली टोलीको मेन्टरको भूमिका निर्वाह गर्ने छन्। त्यस शङ्खलामा नेपालले पहिलो खेल यही कात्तिक ११ मा अमेरिकासँग खेल्नेछ। 

त्यस्तै, नेपालले दोस्रो खेल कात्तिक १३ मा स्कटल्यान्डसँग खेल्नेछ भने तेस्रो खेलमा कात्तिक १७ गते अमेरिकासँग प्रतिस्पर्धा गर्नेछ। चौथो तथा अन्तिम खेलमा नेपालले कात्तिक १९ मा स्कटल्यान्डसँग प्रतिस्पर्धा गर्नेछ। 

नेपाल प्रिमियर लिग (एनपिएल)मा सहभागी टोली जनकपुर बोल्ट्सले दासानायकेलाई केही दिनअघि मुख्य प्रशिक्षकमा नियुक्त गरेको थियो। लिग-२ को त्यस शृङ्खला सकिएपछि दासानायके एनपिएलका लागि नेपाल आउने बताइएको छ।  

असोज ३०, २०८१ बिहीबार २०:३८:३३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।