'घरको हरेक कामकाजमा सघाउँदै आएको जेठो छोरो नै बेपत्ता भएपछि कुन खुसीले दशैं मनाउनु खै!'
काठमाडौं : आज दशैंको टीकाको दिन। गाउँलेहरू हर्षोल्लासका साथ दशैं मनाइरहेका बेला नवलपरासीको नवलपरासी (बर्दघाट–सुस्तापूर्व)को मध्यविन्दु-३ ब्रह्मस्थानस्थित बोटे टोलका गुरूङ दम्पतीको आँखा भने आँगन तेर्सो आउने बाटो हेर्दै बितिरहेको छ।
स्थानीय नन्दे र राजकुमारी गुरूङका जेठा छोरा उत्तम गत साउन २३ मा साँझ घरबाट निस्किएपछि अहिलेसम्म फर्किएका छैनन्। छोरा बेपत्ता भएपछि गुरूङ दम्पतीको घर सुनसान छ।
विगत तीन वर्षदेखि मिर्गौलाको डायलाइसिस गरिरहेकी उत्तमकी ५० वर्षीया आमा राजकुमारी गुरूङ छोराको चिन्ताले झनै थलिएकी छन्।
'घरबाट केही नभनी निस्किएको छोराको अवस्था थाहा छैन', गहभरि आँसु पार्दै राजकुमारीले भनिन् 'कहाँ गएको हो, आफन्त गाउँलेहरू मिलेर धेरै ठाउँमा खोज्नुभयो। तर, छोराको बारेमा केही थाहा पाउन सकिएन।'
जेठा छोरा बेपत्ता भएपछि दशैं खल्लो भएको छ। दशैं मनाउने उत्साह नभएको उनले बताइन्।
'हिँड्ने बेलामा मोबाइल यहीँ छोडेर हिँडेको रैछ', उनले भनिन, 'गाउँमा कतै गयो होला भनेर सोचेका थियौँ। एक दिन, दुई दिन गर्दै यत्रो दिन बित्यो छोरा घर फर्किएन।' छोरा जहाँ जस्तोसुकै अवस्थामा भए पनि चाँडो घर फर्किन उनले भनेकी छन्।
उत्तमका ५८ वर्षीय बाबु नन्दे गुरूङलाई छोराले किन घर छाडेर हिँड्यो भन्ने पनि थाहा छैन।
'हामी बाउछोरा भएर तरकारी खेती, कुखुरापालन तथा बाख्रा व्यावसायिक रुपमा पाल्दै आएका थियौँ', उनले भने, 'दिनभरि सँगै काम गरेका थियौँ, त्यस्तो नराम्रो केही भएको पनि थिएन, बेलुकी घरबाट बाहिर निस्केको छोरा अझै फर्किएन।'
छोराको खोजी गर्न धेरै ठाउँ पुगेको र प्रहरी, संघसंस्थासँग गुहार माग्दासमेत नभेटिएको गुरूङको भनाइ छ।
नन्देका बाबुछोरा नै वैदेशिक रोजगारका लागि पाँच वर्ष दुबईमा बसेर स्वदेश फर्किएपछि व्यावसायिक पशुपालन गर्दै आएका थिए। पत्नी बिरामी आएपछि वैदेशिक रोजगारी छोडेर दुवै जना फर्किएका थिए।
'घरको हरेक कामकाजमा सघाउँदै आएको जेठो छोरो बेपत्ता भएपछि कुन खुसीले दशैं मनाउनु खै', मलिन मुद्रामा नन्देले भने, 'अझै पनि छोरा आउँछ कि भनेर बाटो हेर्दैमा दिनरात कटाउने गरेका छौँ।'
छोरा घर फर्किएमा सबै खुसी फिर्ता आउने र चाडपर्व रमाइलो हुने आशा गुरूङ दम्पतीको मनमा अझै छ।
असोज २६, २०८१ शनिबार १५:०१:१९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
