सरकारमा गएपछि बदलिए बङ्गलादेशका अन्तरिम सरकार प्रमुख युनुस, चुनावको मिति घोषणा गर्नै अस्विकार
एजेन्सी : बङ्गलादेशका अन्तरिम सरकार प्रमुख मुहम्मद युनुसले चुनावका लागि मिति तय गर्न अस्वीकार गर्दै चुनावअघि सुधार आवश्यक रहेको बताएका छन्।
गत अगस्टमा विद्यार्थी नेतृत्वको विद्रोहको परिणामस्वरूप पूर्वप्रधानमन्त्री शेख हसिनालाई अपदस्थ गरी नोबेल शान्ति पुरस्कार विजेता मुहम्मद युनुसलाई बङ्गलादेशको अन्तरिम सरकार प्रमुख नियुक्त गरिएको थियो।
कार्यवाहक सरकारको नेतृत्व गरिरहेका युनुसले प्रथम आलो अखबारले प्रकाशित गरेको अन्तर्वार्तामा आफूमध्ये कसैको पनि लामो समयसम्म सरकारमा बस्ने लक्ष्य नभएको दाबी गरे।
'सुधारहरू महत्त्वपूर्ण छन्, तपाईं भन्नुहुन्छ, चुनाव गर, हामी चुनाव गर्न तयार छौँ तर, सुधारअघि पहिले चुनाव गर्नु गलत हुनेछ, उनले भने।
हसिनाको १५ वर्षेको शासनकालमा विरोधीहरूको सामूहिक नजरबन्द र गैरन्यायिक हत्यासहित व्यापक मानवअधिकार हनन भएको थियो।
हसिना सत्ताबाट हट्नुअघि सातामा छ सयभन्दा बढी मानिस आन्दोलनमा मारिएको राष्ट्रसंघीय प्रारम्भिक प्रतिवेदनले जनाएको थियो। प्रतिवेदनमा सम्भवतः उक्त सङ्ख्या कम थियो भनिएको छ।
हसिना सरकारले अदालत र निजामती सेवाको राजनीतिकरणसहित शक्तिको दुरूपयोग गरी लोकतान्त्रिक पद्धतिलाई ध्वस्त पार्न एकतर्फी चुनाव गरेको आरोप पनि लगाइएको थियो।
युनुसले सार्वजनिक प्रशासनको विरासत पूर्ण रूपमा बिग्रिएको बताउँदै यसलाई भविष्यमा निरङ्कुशतामा फर्कनबाट रोक्न व्यापक सुधारको आवश्यकता रहेको भनेका छन्। सुधारको अर्थ विगतमा जे भयो त्यसलाई नदोहोर्याई आवाश्यक सुधार गर्ने रहेको उनको भनाइ छ।
युनसले हसिनाको सरकार अपदस्थ भएपछि हत्याको आरोपमा पक्राउ परेका धेरै राजनीतिज्ञ र वरिष्ठ अधिकारीहरूको बारेमा गरिएको आलोचनालाई पनि खारेज गरेका थिए।
यी गिरफ्तारीहरूले युनुसको कार्यवाहक सरकारले हसिनाको शासनका वरिष्ठ व्यक्तिहरूमाथि राजनीतिक मुद्दा चलाउने आरोप लगाएको छ।
यद्यपि युनुसले पक्राउ परेका व्यक्तिहरू विरूद्ध सुरू गरिएको कुनै पनि आपराधिक मुद्दा सरकारी हस्तक्षेपबाट मुक्त रहने अभिप्राय पटकपटक दाबी गर्दै आएका छन्। उनले न्यायिक प्रणालीमा सुधार भएपछि मुद्दा अगाडि बढ्ने भनेका छन्।
असोज २२, २०८१ मंगलबार १८:३२:१८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
