एकैदिन १७ हजार बढीले आन्तरिक हवाई यात्रा गरे, यात्रुको चाप बढेपछि एयरलाइन्सले उडान थपे

काठमाडौं : हवाई यात्रुहरूको चाप अत्यधिक बढेपछि हवाई सेवा प्रदायक कम्पनीले उडान सङ्ख्या थपेका छन्। 

बुद्ध एयरका सूचना अधिकारी दीपेन्द्रकुमार कर्णका अनुसार कम्पनीले भद्रपुर र भरतपुरमा दुई-दुई वटा उडान थप गरेको छ। हाल विभिन्न गन्तव्यमा दैनिक दुईतर्फी एक सय ५० हाराहारी उडान गरिरहेको बुद्ध एयरले यात्रुको चाप बढेपछि उडान थपेको हो।

श्री एयरलाइन्सले पनि शुक्रबारदेखि काठमाडौं-भरतपुर-काठमाडौं रूटमा उडान सञ्चालन गर्न लागेको कम्पनीका संस्थागत प्रबन्धक अनिल मानन्धरले बताए। कम्पनीले सुरूमा चार्टर्ड र त्यसपछि नियमित उडान गर्ने जनाएको छ। 

यती एयरलाइन्सले पनि यही असोज १५ देखि काठमाडौं-भद्रपुर-काठमाडौं र काठमाडौं-नेपालगञ्ज-काठमाडौंमा एक/एक वटा उडान थपेको छ। असोज १८ देखि काठमाडौं-जनकपुर-काठमाडौं गन्तव्यमा एक उडान थपिएको यती एयरलाइन्सका प्रवक्ता सुदर्शन बर्तौलाले बताए। 

पछिल्लो अविरल वर्षाका कारण मुलुकका विभिन्न स्थानमा बाढीपहिरोले सडक सञ्जाल अवरुद्ध भएपछि हवाई उडानमा यात्रुको चाप बढेको छ। उडान चाप बढेपछि एयरलाइन्सले उडान थपेर यात्रुलाई गन्तव्य पुर्याइरहेका छन्।

त्रिभुवन अन्तर्राष्ट्रिय विमानस्थल कार्यालयका अनुसार बुधबार आन्तरिकतर्फ हेलिकप्टरसहित १८२ उडान र १८२ वटा अवतरण भएका थिए। जसमा १७ हजार चार जना यात्रुले उडान गरेका थिए। 

अन्तर्राष्ट्रियतर्फ ५२ वटा उडान र ५२ वटा अवतरण भएका थिए। जसमा १५ हजार नौ सय ६२ यात्रुले सेवा लिएका थिए। 

कार्यालयका अनुसार गत सोमबार कुल ५९९, मङ्गलबार ५११ र बुधबार ४७३ वटा उडान भएका छन्।  

असोज १६, २०८१ बिहीबार २१:२८:५१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।