झ्याप्ले खोला पहिरो : पहिरो गाडीमाथि खसेपछि बचाउ-बचाउ भन्ने आवाज आइरह्यो तर, बचाउन सक्ने अवस्थै थिएन

काठमाडौं : गत शुक्रबार साँझदेखि नै देशभर भीषण वर्षा भयो। यसले सडकमा गुडिरहेका सवारीसाधन राम्ररी चल्न पाएका थिएनन्। अवरोध छिचोल्दै काठमाडौंतर्फ आउँदै गरेका सवारीसाधन नागढुङ्गाको ओरालोको जाममा फसे। सानातिना पहिरो त्यसअघि नै खसिसकेका कारण सवारीसाधन अघि बढ्न सकेनन्। 

काठमाडौं र धादिङको सीमाना झ्याप्ले खोलामा अन्य क्षेत्रमा जस्तै सवारीसाधन लामबद्ध थिए। सडक सवारीसाधनले भरिभराउ थिए। रातमा सवारीसाधन अघि बढ्न सकेनन्। त्यही बेला शनिबार बिहान ४ः०० बजे नागढुङ्गाभन्दा केही सय मिटर परबाट खसेको पहिरो तल्लो सडक (झ्याप्ले खोलामा अड्किएका सवारीसाधनमा) बजारियो। 

ठाडो भीर भएकाले सिधा तल एकैचोटी पहिरो खस्यो। माथिल्लो सडकको सिमेन्ट पर्खाल नै भत्काएर पहिरो खस्यो। उक्त ठाउँ नागढुङ्गा सुरुङमार्गभन्दा केही वर पिप्लामोटपट्टी पर्छ।

स्थानीय नानु लामाले भनिन्, 'पहिरो गाडीमाथि खस्यो। अघिल्तिर रहेका साना सवारीसाधनमा रहेका केहीलाई हामीले तानेर बचायौँ, अन्य ठूला सवारीसाधनमाथि पहिरो खसिसकेको थियो, बचाउ बचाउ भन्ने आवाज आइरहेको थियो, हामीले बचाउन सक्ने अवस्था थिएन। पसल नै बगाउने डरले हामी पिप्लामोडतर्फ भाग्यौँ।'

लामाका अनुसार प्रहरीलाई त्यसबारे खबर गरिएको थियो। 

'केही समयपछि प्रहरी आए। त्यसपछि केके भयो थाहा भएन, धेरैपछि आउँदा त यस्तो घटना भइसकेको देख्यौँ', उनले भनिन्। 

नागढुङ्गादेखि नै ठाउँठाउँमा पहिरो खसेको थियो। तत्काल सवारीसाधन चल्ने अवस्था थिएन। अहिले पनि सो क्षेत्रमा दर्जनौं ठाउँमा पहिरो खस्ने अवस्था छ। डीएसपी सूर्य सुवेदीले सडकको अवरोध हटाउन ठूलो सङ्घर्ष गर्नुपरेको बताए। 

यात्रुहरू परिवारजनलाई खोज्दै 
घटनास्थलको दृश्य कारुणिक देखिन्छ। सवारीसाधन क्षतविक्षत भएका छन्। शवहरू पुरिएको ठाउँबाट निकालिएकाले अनुहार चिनिने अवस्था छैन। शवहरू गाडीभित्रै पुरिएको अवस्थाबाट निकालिएका छन्। 

यात्रुका आफन्तहरू उनीहरुको अवस्थाबारे बुझ्न आइपुगेका छन्। उनीहरू आफन्तको खोजीका लागि हारगुहार गरिरहेका छन्। उनीहरू आँसु रोक्न सकिरहेका छैनन्। 

नेपाल प्रहरी, सशस्त्र प्रहरी बल र नेपाली सेना उद्धारमा सक्रिय छ। केही सवारीसाधनबाट शव निकालिएको छ भने गोरखाबाट आएको सवारीसाधन पुरिएकै अवस्थामा छ। निकाल्ने काम जारी छ। उद्धार कार्य जारी छ।  

असोज १३, २०८१ आइतबार २१:५२:२८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।