अविरल वर्षापछि देशभर ६३ स्थानमा यातायात अवरूद्ध, काठमाडौं उपत्यका प्रवेश गर्ने सबै नाका बन्द
काठमाडौं : अविरल वर्षापछि आएको बाढीपहिरो तथा डुबानका कारण देशभर २३ सडकका ६३ स्थानमा यातायात पूर्ण रूपमा अवरूद्ध भएको छ।
सडक विभागले आज दिउँसो १२ बजेसम्म सङ्कलन गरेको प्रारम्भिक विवरणअनुसार बाढीपहिरोका कारण हिमाली तथा पहाडी क्षेत्रका अधिकांश सडकखण्डमा यातायात आवागमन प्रभावित छन्।
त्यस विवरणअनुसार २३ बाटोका ६३ स्थानमा अवरुद्ध भएका छन् भने काठमाडौं उपत्यका प्रवेश गर्ने सबै नाका बन्द भएका विभागको सम्भार महाशाखा प्रमुख अर्जुन अर्यालले जानकारी दिए।
'ठाउँठाउँमा बाटो अवरूद्ध भएकाले विभागका कर्मचारी सबै स्थानमा पुग्न सकेका छैनन्। विद्युत् तथा इन्टरनेट सम्पर्क विच्छेदहुँदा सबै विवरण सङ्कलन गर्न पनि सकिएको छैन। यो प्रारम्भिक विवरण मात्रै हो', अर्यालले भने।
उनका अनुसार पाँचथरबाट ताप्लेजुङ जाने बाटोतर्फ हेवाखोलामा गत वर्ष राखिएको बेलिब्रिज बगाएको छ भने अरनिको राजमार्गको लार्चा भन्ने स्थानको बेलिब्रिज र बीपी राजमार्गको खुर्कोटबाट मन्थलीतर्फ जाने बाटोको पुलसमेत बगाएको छ।
कुलेखानी जलविद्युत आयोजनाको जलाशय खोलिएकाले कान्ति लोकपथमा बागमती पुल उच्च जोखिममा परेको छ। बीपी राजमार्गमा नेपालथोक भन्दा केही अगाडि रोशी खोलामा आएको बाढीले एक सय मिटर जति बाटो बगाएको छ।
अहिले काठमाडौं उपत्यका छिर्ने सबै बाटो बन्द अवस्थामा रहेको अर्यालले जानकारी दिए। धेरै नदीमा पानीको सतह निरन्तर बढिरहेकाले अधिकांश पुल जोखिमको अवस्थामा छन्।
सडक विभागका अनुसार त्रिभुवन राजपथ पूर्ण अवरुद्ध छ। सिर्सिया-पथलैया-हेटौंडा-भैँसे-पालुङ-नौबीसे-काठमाडौं खण्डमा पनि पहिरोका कारण राजमार्ग बन्द भएको हो।
त्यस्तै, धादिङको कमेरे भन्ने स्थानमा पहिरो गएपछि पृथ्वी राजमार्गअन्तर्गतको नौबीसे-मुग्लिन-पोखरा राजमार्ग अवरूद्ध छ।
अरनिको राजमार्गअन्तर्गत काठमाडौं-धुलीखेल-दोलालघाट-खाडीचौर-कोदारी राजमार्ग पनि अवरूद्ध भएको छ। त्यस राजमार्गअन्तर्गत सिन्धुपाल्चोकको लार्चा पुल बगाएपछि यातायात सञ्जाल पूर्ण विच्छेद भएको विभागको सम्भार महाशाखा प्रमुख अर्यालले जानकारी दिए।
त्यसैगरी, कालीगण्डकी करिडोरअन्तर्गत तानसेन-रिडी-कोरला सडकमा पर्वतको केराबारी भन्ने स्थानमा पहिरो खस्दा सडक अवरूद्ध भएको छ। त्यहाँ गुल्मीको राक्स्या र बरल्ला क्षेत्रमा पनि पहिरो खसेको छ।
राप्ती राजमार्गअन्तर्गत अमेलिया-शीतलपाटी-थारमारे मुसिकोट खण्डअन्तर्गत सल्यानको राम्री भन्ने स्थानमा पहिरो जाँदा सडक अवरूद्ध भएको छ। सिद्धार्थ राजमार्गअन्तर्गतको बेलहिया-भैरहवा-बुटवल-वर्तुङ-राम्दी-स्याङ्जा-पोखरा सडक अवरूद्ध छ।
पुष्पलाल (मध्यपहाडी राजमार्ग) अन्तर्गत ओखलढुङ्गाको भडारे क्षेत्रमा पहिरो जाँदा सवारी साधन सञ्चालनमा अवरोध सिर्जना भएको छभने भेडेटार-रबि-राँके सडकअन्तर्गत पाँचथर जिल्लामा सडक अवरूद्ध छ।
सडक डिभिजन नुवाकोटअन्तर्गत ठोरी-भण्ठारा-मलेखु-गल्छी-त्रिशूली-वेत्रावती-मैलुङ-स्याफ्रुबेसी खण्डअन्तर्गत घादिङको भुट्टार क्षेत्रमा तथा बालाजु-त्रिशूली-धुन्चे-स्याफ्रुबेसी खण्डअन्तर्गत नुवाकोटको ३५ किलो र ताँदी पुलमा आएको बाढीका कारण सडक अवरूद्ध भएको विभागले जनाएको छ।
भेरी करिडोरअन्तर्गत छिन्चु-कुदु-जाजरकोट-दुनै-तिन्जे-मरिम सडकखण्डमा पश्चिम रुकुमको त्रिवेणी भन्ने स्थानमा सडकमा पहिरो खसेको छ। यो सडकखण्डअन्तर्गत जाजरकोट जिल्लाको नमूना बस्ती क्षेत्रमा पनि बाढी र पहिरोका कारण समस्या देखिएको विभागले जनाएको छ।
मेची राजमार्गअन्तर्गत केचना-चन्द्रगढी-चारआली-इलाम-फिदिम-गणेशचोक-ताप्लेजुङ-ओलाङचुङगोला खण्डमा पाँचथरको फिदिम नजिकै पहिरोका कारण सडक अवरूद्ध भएको छ।
त्यस्तै, माडर-चौराहवा-गोलबजार-सिरहा-साँघुरे-उदयपुर-मिर्चैया-कटारी-घुर्मी-हिलेपानी-ओखलढुङ्गा सल्लेरी सडकखण्ड प्रभावित बनेको छ। मिर्चैया-कटारी-घुर्मी-हिलेपानी-ओखलढुङ्गा-सल्लेरी सडकमा पनि सवारीसाधन सञ्चालन हुने सकेका छैनन्।
सहिद मार्गअन्तर्गत कोइलाबास-लमही-अर्जुनखोला-घोराही-घर्तिगाउँ-थवाङ-लुकुम खण्ड, रोल्पाको घर्तीगाउँ र दुई खोली खण्डको गरगरे भन्ने ठाउँमा पहिरो गएको छ। यो राजमार्गमा रोल्पाको होलेरी र दारबोट खण्डमा पनि अवरोध सिर्जना भएको छ।
अर्घाखाँचीको तौलिहवा-गोरुसिङ्गे-सन्धीखर्क सडकअन्तर्गत नरपानी-खुम्ती-सन्धिखर्कमा पहिरो गएको सडक विभागले जनाएको छ।
त्यसैगरी, पुष्पलाल राजमार्गअन्तर्गत खोटाङको खोक्सेली तथा चिसापानी, सिन्धुलीको रिठ्ठाबोट, फिक्कल, ट्याँउ खोला र कुखुरेटार, हर्जेनी, बलेनी, सालघारीलगायत क्षेत्रमा बाढी र डुबानको समस्या देखिएको छ।
तमोर करिडोरअन्तर्गत चतरा-मुलघाट-माझीटार-अमरापुरडाँडा-गणेशचोक सडकको चतरा पुलदेखि बराहक्षेत्रसम्म जाने बाटोमा तथा रिडी-बालकोट-हंसपुर-प्युठान-सुर्खेत खण्डअन्तर्गत दाङको मुर्कुटी भन्ने स्थानमा सडक पूर्ण रूपमा अवरुद्ध छ।
डुम्रे-बेँसीशहर-चामे सडकअन्तर्गत मनाङको ताल डाँडा क्षेत्रमा पनि यातायात सञ्चालनमा समस्या भएको छ।
कान्ति राजपथअन्तर्गत हेटौंडा-बागमती-टिकाभैरव-भैँसेपाटी-एकान्तकुना सडकखण्ड पनि अवरूद्ध छ। यो राजमार्गको आँपचौर भन्ने स्थानमा बाढी र पहिरोका कारण सडक अवरूद्ध भएको हो।
ग्वार्को-लुभु-लाकुरीभञ्ज्याङ-कुशादेवी-पनौती-दाहालटार खण्डअन्तर्गत ललितपुरको लाँकुरीभञ्ज्याङस्थित मानेदोभान क्षेत्रमा बाढी र पहिरोका कारण समस्या सिर्जना भएको छ।
दक्षिणकाली नगरपालिका-८ को सिस्नेरी सडकखण्ड, कीर्तिपुर नगरपालिका-६ को बल्खु फर्पिङ र वडा नम्बर १० को त्रिभुवन विश्वविद्यालय सेवा आयोग अगाडि पहिरो खसेका छ। गोदावरी नगरपालिका-६ को लेले टिकाभैरव जाने बाटोमा पहिरो खसेको छ।
नदीमा पुल बगाएको र ठूलो पहिरो खसेको स्थानमा बाहेक अन्य स्थानहरूमा कम्तीमा दुई घण्टाभित्र अवरोध हटाउने गरी विभागको टोली परिचालन गरिएको विभागको सम्भार महाशाखा प्रमुख अर्यालले जानकारी दिए। सडक सञ्चालन गर्न शवभिन्न सडक डिभिजन तथा मातहतका कार्यालयका टोली तयारी अवस्थामा रहेका उनले बताए।
'बाटो र पुल बगाएको स्थानमा बाहेक ठूलो पहिरो नभएका ठाउँमा बढीमा दुई घण्टाभित्रमा सडक खुलाउन सक्नेगरी तयारी अवस्थामा बसेका छौँ। निरन्तर पानी परिरहेको छ। अधिकांश स्थानमा लेदोसहितको बाढीपहिरो आउने जोखिम रहेकाले पहिरो पन्छाएर सडक सञ्चालनमा केही समस्या भएको छ, अर्यालले भने।
असोज १२, २०८१ शनिबार १६:३५:४७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
