दुई महिनामा ११ अर्ब ६ करोडको पेट्रोल आयात, एक अर्ब ९९ करोडको कार्पेट निर्यात

काठमाडौं : चालु आर्थिक वर्षको पहिलो दुई महिनामा झण्डै सात अर्ब रूपैयाँको स्मार्टफोन आयात भएको छ। भन्सार विभागको तथ्याङ्कअनुसार छ अर्ब ७० करोड ८१ लाख ५८ हजार बराबरको चार लाख ५४ हजार नौ सय ५८ थान स्मार्टफोन आयात भएको हो। 

यस अवधिमा सबैभन्दा धेरै पेट्रोलियम पदार्थको आयात भएको छ। विभागका अनुसार ११ अर्ब छ करोड ५२ लाख चार हजार बराबरको पेट्रोल आयात भएको छ भने १३ अर्ब ६४ करोड ५२ लाख ५० करोड बराबरको डिजेल आयात भएको छ।

त्यस्तै, एलपी ग्यास नौ अर्ब ४२ करोड ५६ लाख ८५ हजार बराबरको आयात भएको छ। उक्त अवधिमा सवारी साधनको आयात पनि उच्च देखिएको छ। 

विभागले सार्वजनिक गरेको तथ्याङ्कअनुसार दुई अर्ब ९४ करोड बराबरको मोटरसाइकल र दुई अर्ब ४३ करोड २१ लाख २६ हजार बराबरको विद्युतीय सवारी आयात भएको छ।

नेपालबाट बढी निर्यात हुनेमा कार्पेट, चिया, जुट, धागोलगायतका वस्तु छन्। विभागका अनुसार साउन र भदौ महिनामा सबैभन्दा धेरै एक अर्ब ९९ करोड ९६ लाख सात हजार बराबरको कार्पेट निर्यात भएको छ। 

त्यस्तै, एक अर्ब १४ करोड २४ लाख ३२ हजार बराबरको चिया निर्यात भएको छ। जुट, धागो, जुसलगायतका वस्तु बढी निर्यात हुनेमा रहेका छन्। 

चालु आर्थिक वर्ष २०८१/८२ को सुरुवाती दुई महिनामा कूल दुई खर्ब ८७ अर्ब ६३ करोड ५७ लाख २८ हजार बराबरको वैदेशिक व्यापारमा नेपालले दुई खर्ब ३७ अर्ब ४४ करोड ९५ लाख २३ हजार बराबर व्यापार घाटा व्यहोर्यो। 

साउन र भदौ महिनामा दुई खर्ब ६२ अर्ब ५४ करोड २६ लाख २६ हजार बराबरको आयात हुँदा २५ अर्ब नौ करोड ३१ लाख तीन हजार बराबरको मात्रै निर्यात भएको छ। 

असोज ११, २०८१ शुक्रबार १९:३९:३२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।