काठमाडौंका नदीहरूमा पानीको प्रवाह उच्च, महानगरले भन्यो- सतर्कता अपनाउनू

काठमाडौं : काठमाडौं महानगरपालिकाले अविरल वर्षाकाबीच आवश्यक सतर्कता अपनाउन आग्रह गरेको छ।

उपत्यकामा बिहीबार रातिदेखि लगातार भइरहेको वर्षा र वर्षाका कारण हुन सक्ने सम्भावित विपद्बाट जोगिन आवश्यक सतर्कता अपनाउन आग्रह गरेको हो।

महानगरले विपद् सामनाका लागि पूर्वतयारी गर्न पनि आग्रह गरेको छ। 

महानगरपालिकाले शुक्रबार दिउँसो सूचना जारी गर्दै भनेको छ, ‘नियमित झरी र समय समयमा भारी वर्षा भइरहेकोले काठमाडौंका नदीहरूमा पानीको प्रवाह उच्च भएको छ। यसबाट बस्ती डुबान, जमिन कटान, जन धनको क्षतिको जोखिम बढेको छ।’

सार्वजनिक सूचनामा नदी किनारा, खोला, खोल्सामा अत्यावश्यक कामबाहेक नजानसमेत सचेत गराएको छ। 

‘नदी किनारा, खोला, खोल्सामा अत्यावश्यक कामबाहेक नजाऔँ। पानी जम्मा भएको सडकमा प्रवेश नगरौँ,’ सूचनामा भनिएको छ, ‘सवारी प्रवेश नगराऔँ, कोरिडोर, सडक किनारा, सडक तथा गल्लीमा सवारी पार्किङ नगरौँ, अनावश्यक सामान राखेर आवागमनमा अवरोध नगरौँ।’

महानगरपालिकाले जलजन्य विपद् (डुबान, कटान, बाढी, पहिरो) को जोखिम भए तत्काल सम्पर्क गर्न पनि भनेको छ। 

बिहीबार रातिदेखि काठमाडौं  उपत्यकासहित देशभर अविरल भइरहेको वर्षा अझै आइतबारसम्मै रहने बताइएको छ।  

असोज १०, २०८१ शुक्रबार १५:३८:३८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।