देउवाले भने 'उच्छृङ्खल तत्त्वले सार्वजनिक कार्यक्रममा आरजुविरुद्ध नाराबाजी गरेको हो'

वीरगञ्ज : नेपाली कांग्रेसका सभापति शेरबहादुर देउवाले सङ्घीयता कार्यान्वयनपछि मुलुक शिक्षा र स्वास्थ्यमा आत्मनिर्भर बन्दै गएको बताएका छन्। 

पर्साको पटेवा सुगौली गाउँपालिकाको नवनिर्मित आधारभूत अस्पताल भवनको आज उद्घाटन गर्दै उनले सङ्घीयतालाई थप बलियो बनाउँदै नागरिकहितमा काम गर्नुपर्नेमा जोड दिए। 

'मुलुक सङ्घीय संरचनामा गइसकेपछि सोही ढाँचाअनुसार नै क्रमशः शिक्षा र स्वास्थ्य क्षेत्रको विकास हुँदै गइरहेको छ। सरकारले आधारभूत सेवालाई जनस्तरसम्म पुर्याउनको लागि अधिकतम प्रयास गर्दै आइरहेको छ, जसको फलस्वरूप आज यहाँ पनि अस्पताल स्थापना भएको छ', देउवाले भने, 'अहिले जनताको सबैभन्दा ठूलो आवश्यकता नै स्वास्थ्य उपचार र शिक्षा हो।'

सभापति देउवाले आधारभूत अस्पताललाई जनतालाई स्वास्थ्य सेवा प्रभावकारी ढङ्गले प्रवाह गर्न अनुरोध गरे। 

त्यसअघि त्यही कार्यक्रममा सहभागी हुन गएका देउवाले सिमरा विमानस्थलमा सञ्चारकर्मीसँग कुराकानीमा परराष्ट्रमन्त्री डा. आरजु राणा देउवा विरुद्धमा सार्वजनिक कार्यक्रममा नाराबाजी गर्ने कार्य पनि उत्छृंखल तत्त्वले गरेको आरोप लगाए।  

असोज ७, २०८१ मंगलबार १९:२८:१५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।