साफ महिला च्याम्पियनसिप फुटबलको लागि ४० जना खेलाडी छनोट

काठमाडौं : घरेलु मैदानमा आयोजना हुने महिला साफ च्याम्पियनसिप फुटबल प्रतियोगिताका लागि प्रारम्भिक चरणमा ४० खेलाडी छनोट भएका छन्।

आगामी कात्तिक १ देखि १४ सम्म हुने उक्त प्रतियोगिताको लागि नेपाली राष्ट्रिय फुटबल टोलीका मुख्य प्रशिक्षक राजेन्द्र तामाङले आज खेलाडी छनोट गरेका हुन्। 

उनले राष्ट्रिय टोलीबाट खेलिरहेका खेलाडीबाहेक राजधानीमा जारी एन्फा महिला लिग प्रतियोगितामा उत्कृष्ट खेल प्रदर्शन गरेका खेलाडीलाई समेट्दै ४० खेलाडीलाई बन्द प्रशिक्षणमा बोलाएका छन्। 

छनोट हुने नेपाली टोलीमा अञ्जली तुम्बापो सुब्बा, अन्जना रानामगर, उसा नाथ, गीता राना, अमृता जैसि, समीक्षा घिमिरे, नीसा थोकर, पुजा राणा, विमला विक, हिराकुमारी भुजेल, प्रतीक्षा चौधरी, रेणुका नगरकोटी, प्रीति राई, सरू लिम्बु र दीपा शाही छन्।

त्यसैगरी सविता रानामगर, अनिता बस्नेत, अमिषा कार्की, विमला चौधरी, सावित्रा भण्डारी, रेखा पौडेल, रश्मीकुमारी घिसिङ, अनिता केसी, चन्द्रा भण्डारी, सरस्वती हमाल, तुलसा बोहरा, भूमिका बुढाथोकी, ममता पुन, यशोदा शाही, अञ्जली माचामसी, सुष्मा तामाङ, सुक्रिया मिया, सजिना कोइराला, नेहाकुमारी चौधरी, सजनी थोकर, अनिता लामगेल, लिला जोशी, सुशीला चौधरी, कुस्मा राई र सुनिता भुलन छनोटमा परेका छन्।

प्रारम्भिक प्रशिक्षणमा डाकिएकामध्ये गोलकिपर एन्जिला तुम्बाप्पो सुब्बा, सावित्रा भण्डारी र रेखा पौडेल भने हाल विदेशी लिग खेलिरहेका छन्। सावित्रा फ्रान्स, एन्जिला ग्रिस र रेखा युनाइटेड अरब इमिरेट्स (यूएई) को क्लबमा आबद्ध छन्।

प्रतियोगितामा नेपाल समूह ‘बी’मा रहेको छ। नेपालको समूहमा श्रीलङ्का, माल्दिभ्स र भुटान रहेका छन्। 

त्यसैगरी समूह ‘ए’मा भारत, बङ्गलादेश र पाकिस्तान छन्। उक्त प्रतियोगिताको खेलहरू त्रिपुरेश्वरस्थित दशरथ रङ्गशाला मैदानमा हुनेछ।

असोज ८, २०८१ मंगलबार १८:५७:३२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।