इन्धन सुविधा कम भएको गुनासो गरेपछि कोशी प्रदेशका सभामुखलाई ७५ लिटर पेट्रोल थप, उपसभामुखको पनि थपियो
काठमाडौं : कोशी प्रदेश सरकारले प्रदेशसभाका सभामुख अम्बरबहादुर विष्ट र उपसभामुख सृजना दनुवारको सुविधा थप गरेको छ।
प्रदेश सभाका पदाधिकारी तथा सदस्यको पारिश्रमिक र सुविधा सम्बन्धी ऐन २०७५ को अनुसूची संशोधन गर्दै सभामुख र उपसभामुखलाई दिने इन्धन सुविधा थप गरेको हो।
मन्त्रिपरिषद् बैठकले सभामुखका लागि मासिक ७५ लिटर र उपसभामुखका लागि ५० लिटर पेट्रोल सुविधा थप गर्ने निर्णय गरेको आन्तरिक मामिला तथा कानुन मन्त्रालयका निमित्त सचिव कमलबहादुर थापाले जानकारी दिए।
त्यसअघि प्रदेश सभाका पदाधिकारी तथा सदस्यको पारिश्रमिक र सुविधा सम्बन्धी ऐन २०७५ को अनुसूची १ अनुसार सभामुखले मासिक १५० र उपसभामुखले १२५ लिटर पेट्रोल पाउँदै आएका थिए।
सभामुख र उपसभामुखले इन्धन सुविधा कम भएको गुनासो गरेपछि आन्तरिक मामिला तथा कानुन मन्त्रालयको प्रस्तावमा भदौ २७ को मन्त्रिपरिषद् बैठकले यो निर्णय गरेको हो।
प्रदेशमा प्रमुख प्रतिपक्षी दलको नेताले र सत्तापक्षको प्रमुख सचेतकले १२५–१२५ लिटर इन्धन मासिक पाउनेछन्।
प्रदेशसभाको सभामुखमा राप्रपाका विष्ट र उपसभामुखमा एमालेकी दनुवार छिन्।
असोज ७, २०८१ मंगलबार १६:२९:२४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
