जब दिलबहादुर काठको कोसी बोकेर मुख्यमन्त्रीलाई भेट्न आइपुगे...

बुटवल : शिरमा ढाका टोपी। खुट्टामा प्लास्टिकको चप्पल अनि पिठ्युँमा भारी। उमेरले ६० बर्ष पुगेका दिलबहादुर शाही लुम्बिनी प्रदेशका मुख्यमन्त्री चेतनारायण आचार्यलाई भेट्न प्रदेश राजधानी राप्ती उपत्यका देउखुरी आइपुगे। दसैं खर्चका माग्न आएका उनले मुख्यमन्त्रीलाई आफ्नै हातले बनाएको काठको कोसी उपहार दिए। 

‘यो काठको कोसी हो। हातैले बनाएको। यस्तो कोसी बनाउन थालेको धेरै भइसक्यो’ उनले भने, ‘मुख्यमन्त्रीज्यू, दसैं त आइहाल्यो। खर्च चाहियो।’ 

सुर्खेतमा बस्दै आएका शाही दसैं खर्च माग्न यसपालि एक्लै लुम्बिनी प्रदेशसम्म आइपुगे। 

‘साथीहरू आउन थालेका थिए। गाडी चढ्न डराए’ उनले भने, ‘मरे मै मरुला भनेर आएँ।’ 

राउटे समुदायका व्यक्तिलाई सरकारले सामाजिक सुरक्षा भत्ता दिँदै आएको छ। उनले पनि मासिक चार हजार रुपैयाँ भत्ता बुझ्दै आएका छन्। 

राउटे समुदाय हरेक बर्ष दसैंको खर्चको लागी प्रदेश सरकारमा धाउँदै आएका छन्। 

मुख्यमन्त्री आचार्यले राउते समुदायलाई राम्रोसँग दसैं मनाउन दिबहादुर मार्फत सन्देश पठाए।   

असोज २, २०८१ बुधबार २२:२९:४८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।