सञ्चार क्षेत्र राज्यको नजरमा पर्न सकेको छैन : सञ्चारमन्त्री

काठमाडौं : सञ्चार तथा सूचना प्रविधि मन्त्री पृथ्वी सुब्बा गुरुङले सञ्चार क्षेत्र सधैँ ओझेलमा परेको र राज्यको नजरमा नपरेको क्षेत्र भएको बताएका छन्। 

बुधबार काठमाडौंमा आयोजित एक कार्यक्रममा उनले सञ्चार क्षेत्र सबै पुरानो कानूनले चलिरहेको भन्दै सबैभन्दा संवेदनशील क्षेत्र भएर पनि राज्यको ध्यान नगएको बताए। 

उनले भने, ‘सञ्चार क्षेत्र जटिल छ, यो क्षेत्र आफैंमा संवेदनशील छ। अहिलेसम्म यो क्षेत्रमा केही भएको छैन भन्ने हो भने यो अवस्थासम्म आइसकेका छौं। सबै जनाले काम गर्नु भएकै छ। तर, सार रुपले भन्ने हो भने भएको केही पनि छैन। सबै पुरानो कानूनले चलिरहेका छन्। नयाँ नीति, कानून केही छैन। मुलुकमा गणतन्त्र आइसक्यो, तर कानूनमा केही पनि परिवर्तन छैन।’

यस्तै, उनले यो वर्ष हुलाकको राष्ट्रिय नीति बनाउने भन्दै हुलाकको विषयमा नीतिगत रुपमा फड्को मार्ने बताए।
 
उनले भने, ‘यो वर्ष हुलाकको राष्ट्रिय नीति बनाउने, पहिला पनि थियो होला त्यसलाई सुधार गरेर नयाँ ल्याउने। नीति भएपछि मात्र त्यसको आधारमा कानून बन्छ। यो वर्षभित्र सबै नीतिका काम सकिन्छ। हुलाकको विषयमा नीतिगत रुपमा फड्को मार्ने काम गर्छौँ।’

उनले नीतिगत, कानून, बजेट, जनशक्ति लगायतको समस्या कहाँ छ भनेर सबै पहिल्याएर  समाधान गर्नुपर्ने भन्दै यो वर्षभित्र सबै कुराको समाधान गर्ने प्रतिबद्धता पनि व्यक्त गरे।  

असोज २, २०८१ बुधबार १६:०३:४१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।