क्रिकेटको इतिहासमा ऐतिहासिक निर्णय : विश्वकप क्रिकेटमा महिला र पुरुषको पुरस्कार बराबर

काठमाडौं : अन्तर्राष्ट्रिय क्रिकेट परिषद (आइसीसी) ले ऐतिहासिक निर्णय गर्दै महिला र पुरुष टी-२० विश्व कपको पुरस्कार रकमलाई बराबरी बनाएको छ। यो निर्णयलाई क्रिकेटको इतिहासमा कोशेढुंगा सावित हुने अपेक्षा गरिएको छ।

आईसीसीले २०२४ को महिला टी-२० विश्व कपको पुरस्कार रकम ७९ लाख ५८ हजार ८० अमेरिकी डलर तोकेको छ। यो अघिल्लो संस्करणको तुलनामा २२५ प्रतिशत वृद्धि हो। 

विजेताले २.३४ मिलियन डलर पुरस्कार प्राप्त गर्ने छन् भने उपविजेताले १.१७ मिलियन डलर प्राप्त गर्ने छन्।

प्रमुख टोली खेलहरूको बीचमा पुरुष र महिला विश्व कपको पुरस्कार रकम बराबरी गर्ने एक मात्र खेलको रुपमा क्रिकेट बनेको छ।
 
पुरस्कारमा विजेताले २.३४ मिलियन डलर (२०२३ मा १ मिलियन डलर), उपविजेताले १.१७ मिलियन डलर (२०२३ मा ५००,००० डलर) सेमिफाइनलमा परेका टोली प्रत्येकले ६७५,००० डलर (२०२३ मा २१०,००० डलर) पाउने छन्। सम्पूर्ण पुरस्कारको रकम भने ७,९५८,०८० डलर (२०२३ मा २.४५ मिलियन डलर) पाएका थिए। 

२०२४ को महिला टी-२० विश्व कप संयुक्त अरब इमिरेट्समा हुँदै छ। उक्त विश्वकपमा १० टोलीले २३ खेल खेल्नेछन्। विश्वकप ३ अक्टोबरबाट सुरू हुनेछ। 

उद्घाटन खेलमा बंगलादेशले स्कटल्याण्डसँग प्रतिस्पर्धा गर्ने छ।

भदौ ३१, २०८१ मंगलबार १६:१५:१३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।