त्रिशुलीमा खसेको ट्रकका चालक सम्पर्कविहीन, प्रहरी भन्छ- ‘घटना शंकास्पद’
चितवन : नारायणगढ-मुग्लिन सडक खण्डको सिमलतालमा सडकबाट त्रिशुली किनारमा खसेको ट्रकका चालक सम्पर्कविहीन भएका छन्।
ट्रक पानी बाहिर किनारमा रहेको छ। जिल्ला प्रहरी कार्यालयका प्रहरी नायव उपरीक्षक भेषराज रिजालका अनुसार चालक यमबहादुर घलेको मोबाइल स्विचअफ छ।
घटनास्थल पुगेर फर्कँदै गरेका रिजालले भने, ‘चालक सम्पर्कमा छैनन्, घटना शंकास्पद देखिएको छ।’
दुर्घटनाको अवस्था हेर्दा चालक नदीमा नभएर बाहिर सम्पर्कविहीन भएको हुनसक्ने उनको भनाइ छ।
यातायात कार्यालयमार्फत ट्रक धनीको पहिचान गरेर चालक खोजीकार्य भइरहेको उनले बताए।
ना ६ ख ६२८३ नम्बरको ट्रक भैरहवाबाट सूर्यमुखी तेल बोकेर ललितपुरतर्फ जाँदै गरेको थियो।
ट्रकमा दुई हजार दुई सय २५ कार्टुन तेल लोड गरिएको थियो। ट्रक आज बिहान सडकबाट झण्डै एक सय मिटर तल त्रिशुली किनारमा खसेको हो।
भदौ २९, २०८१ आइतबार ११:४६:३४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
