कतार हिँडेका सुरज जेठी श्रीमतीको उजुरीपछि बहुविवाहको आरोपमा विमानस्थलबाट पक्राउ परे
गोरखा : विदेश जान हिँडेका गोरखाका एक युवकलाई प्रहरीले बहुविवाहको आरोपमा त्रिभुवन अन्तराष्ट्रिय विमानस्थलबाट पक्राउ गरेको छ।
आरुघाट गाउँपालिका-६ घर भएका २८ वर्षीय सुरज गुरुङलाई बहुविवाहको आरोपमा पक्राउ गरी अनुसन्धान सुरू गरिएको जिल्ला प्रहरी कार्यालयका सूचना अधिकारी डीएसपी रमेशकुमार श्रेष्ठले जानकारी दिए।
सुरजकी जेठी श्रीमती रिता गुरुङले यही भदौ २३ मा जिल्ला प्रहरी कार्यालयमा बहुविवाहको जाहेरी दर्ता गरेकी थिइन्। लगत्तै विदेश जान लागेको थाहा पाएपछि अध्यागमन कार्यालय तथा त्रिभुवन अन्तर्राष्ट्रिय विमानस्थल सुरक्षा कार्यालयसँग आवश्यक समन्वय गरी अनुसन्धानका लागि उनलाई पक्राउ गरिएको हो।
बहुविवाहको कसुरबाट भाग्न सुरज वैदेशिक रोजगारीका लागि कतार जान लागेको भन्ने प्रहरीले सूचना पाएपछि आवश्यक समन्वय गरी विमानस्थलबाट पक्राउ गरिएको डीएसपी श्रेष्ठले बताए।
सुरजकी जेठी श्रीमती रिताले आफू हुँदाहुँदै श्रीमान्ले कान्छी घताने गुरुङसँग विवाह गरेको भन्दै प्रहरीमा बहुविवाहको जाहेरी दिएकी थिइन्।
'उजुरी परेपछि गत सोमबार जिल्ला अदालत कार्यालयबाट पक्राउका लागि अनुमति लिएर सोही दिन पक्राउ गरी गोरखा ल्याइएको हो', श्रेष्ठले भने।
उनलाई आज अदालतबाट अनुमति लिएर हिरासतमा राखी थप अनुसन्धान सुरू गरिने छ।
भदौ २६, २०८१ बिहीबार १५:४२:५४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
