बालेन शाहको नेतृत्वमा नौ सदस्यीय स्टेरिङ कमिटी गठन, चिरीबाबु महर्जन सदस्य
काठमाडौं : काठमाडौं महानगरपालिका ‘संघीय राजधानी सहरी क्षेत्र सार्वजनिक यातायात परिषद’को दोस्रो बैठकले परिषदको निर्णय प्रक्रियालाई समन्वय र व्यवस्थापनलाई चुस्त बनाउन नौ सदस्यीय स्टेरिङ कमिटी गठन गर्ने निर्णय गरेको छ। परिषद सदस्यको संख्या ३५ जना छ।
संख्या धेरै भएकाले कार्य चुस्त बनाउन कठिन हुने भएपछि परिषदका अध्यक्ष एवं काठमाडौँ नगर प्रमुख बालेन्द्र शाह (बालेन) को अध्यक्षतामा बसेको दोस्रो बैठकले कमिटी गठन गर्ने निर्णय गरेको हो।
कमिटीमा काठमाडौँ महानगरपालिकाका प्रमुख शाहको संयोजकत्वमा गठित समितिमा ललितपुर महानगरपालिकाका प्रमुख चिरीबाबु महर्जन, चाँगुनारायण नगरपालिकाका प्रमुख जीवन खत्री, चन्द्रागिरी नगरपालिकाका प्रमुख घनश्याम गिरी र वुढानिलकण्ठ नगरपालिकाका प्रमुख मिठाराम अधिकारी सदस्य छन्।
सार्वजनिक यातायात प्रणाली र पूर्वाधारसँग सम्बन्ध राख्ने यातायात व्यवस्था कार्यालय, ट्राफिक प्रहरी कार्यालय र सडक विभागलाई सदस्य राखिएको छ।
परिषदका प्रमुख कार्यकारी अधिकृत कुवेर नेपालीले सदस्य सचिवको काम गर्ने भएका छन्। बैठकले आर्थिक वर्ष २०८०/०८१ को खर्च अनुमोदन गरेको छ भने आर्थिक वर्ष २०८१/०८२ का लागि ९ करोड ६२ लाख रुपैयाँको बजेट तथा कार्यक्रम पारित गरेको छ।
यसले जिआइइस सर्भिस, स्मार्ट ट्राफिक मोनिटरिङ् सिस्टम, एकीकृत एप्लिकेसन निर्माण, तथ्य तथा तथ्याङ्क संकलन, रुट पुनरावलोकन, सार्वजनिक यातायात सञ्चालन मार्गनिर्देशन तयारी, अनुसन्धानमूलक कार्यक्रम सञ्चालनलगायत कार्यक्रम सञ्चालन हुनेछन्। सर्भर र सफ्टवेयर खरिद कार्य हुनेछन्।
गएको वर्ष परिषदको कोषमा संघीय सरकारबाट एक करोड रुपैयाँ र काठमाडौँ महानगरपालिकाबाट एक करोड रुपैयाँ प्रदान गरिएको थियो। यस वर्ष काठमाडौँ महानगरपालिकाले आठ करोड रुपैयाँ र संघीय सरकारले एक करोड रुपैयाँ उपलब्ध गराएका छन्। अघिल्लो वर्षको मौज्दात करिब ६२ लाख रुपैयाँ छ।
बैठकमा अध्यक्ष शाहले सार्वजनिक यातायात प्रणालीका लागि स्थानीय तहको दायित्व प्रमुख रहने भएकाले यसलाई स्थानीय तहकै आर्थिक योगदानमा सञ्चालन गर्नुपर्ने बताए।
बैठकले सदस्य पालिकाहरुलाई यातायात फोकल पर्सन तोकेर सात दिनभित्र परिषदमा नाम पठाउन अनुरोध गरेको छ।
भदौ १३, २०८१ शुक्रबार १६:१४:३८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
