फिल्म ‘जवान’ को कपी गर्दा प्रचारको साटो आलोचना बढेपछि ‘एक्टर’ टिमले ल्यायो दोस्रो पोस्टर

काठमाडौँ : पहिलो पोस्टर सार्वजनिक भएपछि प्रचार भन्दा उल्टो आलोचना बढेपछि फिल्म एक्टरको टिमले दोस्रो पोस्टर सार्वजनिक गरेको छ। पहिलो पोस्टरमा ब्यान्डेजै ब्यान्डेजकाबीचमा विभिन्न अवतारमा देखाइएको अभिनेता प्रदीप खड्कालाई दोस्रो पोस्टरमा घाइते मात्र देखाइएको छ।

पहिलो पोस्टर साहरुख खान अभिनीत जवानको पोस्टरको नक्कल गरिएको थियो। पोस्टर त्यति आकर्षक पनि देखिएको थिएन। हतार हतार ६ दिन अगाडि पोस्टर सार्वजनिक भएपछि फिल्मबारे चासो बढ्नुको साटो थप नकारात्मक टिप्पणी बढेपछि बिहीबार निर्माण टिमले नयाँ पोस्टर सार्वजनिक गर्यो जसमा प्रदीपलाई घाइते अवतारमै राखिएको छ।

पहिलो पोस्टरको तुलनामा दोस्रो पोस्टर केही सुधारिएको छ। तर तस्बिरमा अभिनेता प्रदीपको फेसियल एक्सप्रेसन भने निकै झोक्राएको देखिन्छ। तस्बिरको अवस्था र अभिनेताको फेसियन एक्सप्रेसबीच तालमेल नभए पनि फिल्मको पहिलो पोस्टर जस्तो झुर छैन।

पहिलो पोस्टर त ट्वाक्कै जवानको नक्कलै देखिएको थियो। दोस्रो पोस्टर पनि यसबाट जोगिन सकेको छैन। फिल्म सैतान अनि रणवीर कपुरको एनिमलको प्रभाव पोस्टरमा देखिन्छ। तर नक्कलै गर्यो भन्ने तहको डिजाइन भने छैन।

निर्माण टिमले फिल्म कात्तिकको १५ गते लक्ष्मीपूजाको दिन रिलिज गर्ने घोषणा गरेको छ। फिल्ममा प्रदीपसँगै दिव्या रायमाझी, आना शर्मा, राजवल्लभ कोइराला, दिव्य देव, सुशील सिटौला लगायतका कलाकारहरूको अभिनय रहेको छ। अन्य कलाकारहरूले भने अझै पोस्टरमा स्थान पाउन सकेका छैनन्।

राजन भुसालको डेब्यू निर्देशनमा तयार भएको फिल्ममा थमन कुमार भण्डारीको लगानी छ। आकाश बराल र राजन भुसालले फिल्मको कथा लेखेका हुन्।

भदौ १२, २०८१ बिहीबार १९:११:५४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।