गोलकिपर जियारथ शेखले टाइब्रेकरमा भुटानको तीन प्रहार रोकेपछि नेपाल फाइनलमा

काठमाडौँ : भुटानलाई टाइब्रेकरमा ४–१ ले पराजित गर्दै नेपाल साफ यु-२० च्याम्पियनसिपको फाइनलमा पुगेको छ । सातदोबाटोस्थित एन्फा कम्प्लेक्समा भएको पहिलो सेमिफाइनलको खेल निर्धारित समयमा नतिजामा पुग्न नसकेपछि खेल टाइब्रेकरमा पुगेको थियो।

नेपालका गोलकिपर जियारथ शेखले टाइब्रेकरमा भुटानका तीन खेलाडीको प्रहार बचाएपछि नेपाल फाइनलमा पुगेको हो। टाइब्रेकरको पहिलो प्रहारमा नेपालका लागि राम थापा र भुटानका जेत्सन दोर्जीले गोल गरेका थिए। त्यसपछि दोस्रो प्रहारमा नेपालका अभिनाश स्याङ्तानले गोल गर्दा भुटानका जिग्मे नाम्गेलको प्रहार बाहिरियो। नेपालका सीमान्त थापाले तेस्रो प्रहारमा गोल गर्दा भुटानका उग्वेन जिग्मेको प्रहार जियारत शेखले नै बचाए। चौथो प्रहारमा जियारतले गोल गर्दै नेपाललाई फाइनल पुर्याए।

त्यसअघि खेलको निर्धारित ९० मिनेटमा दुवै टोलीले १–१ गोल गरेका थिए। खेलको ५६ औँ मिनेटमा भुटानले अग्रता लिएको थियो। जेत्सन दोर्जीले पेनाल्टी क्षेत्र बाहिरबाट गरेको गोल भएको थियो। भुटान खेलको  ७७ औँ मिनेटमा १० खेलाडीमा सीमित बन्यो।

भुटानका किन्जाङ तेन्जिङलाई रेफ्रीले रातो कार्ड देखाउँदै बाहिर पठाएका थिए। किन्जाङले नेपालका खेलाडीमाथि फाउल गरेका थिए। खेलको ७८औँ मिनेटमा नेपालले बराबरी गोल फर्कायो। रातो कार्डपछि नेपालले पाएको फ्रिकिक बलबाट आएको पासबाट नीराजन धामीले करिब सिक्स यार्ड बक्समा हेड गर्दै बललाई जाली चुमाएका थिए।

च्याम्पियनसिपको दोस्रो सेमिफाइनलमा सोमबार भारत र बङ्गलादेशबिच हुँदैछ। 

भदौ ८, २०८१ आइतबार १९:५४:५९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।