राष्ट्रिय सभाबाट बिनासंशोधन सर्वसम्मतिले पारित भयो टीआरसी विधेयक

काठमाडौं : राष्ट्रिय सभाबाट सङ्क्रमणकालीन न्यायसँग सम्बन्धित विधेयक (टीआरसी) बिनासंशोधन पारित भएको छ। 

सभाको आजका बैठकले कानुन, न्याय तथा संसदीय मामिलामन्त्री अजयकुमार चौरसियाले प्रस्तुत गर्नुभएको ‘प्रतिनिधिसभाबाट सन्देशसहित प्राप्त बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०८१ पारित गरियोस्’ भन्ने प्रस्ताव सर्वसम्मतिले पारित गरेको हो।
 
त्यसअघि कानुनमन्त्री चौरसियाद्वारा प्रस्तुत ‘प्रतिनिधिसभाबाट सन्देशसहित प्राप्त बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९ माथिको दफावार छलफल सदनमा गरियोस्’ भन्ने प्रस्ताव सर्वसम्मतिले स्वीकृत गरेको थियो।
 
राष्ट्रियसभा अध्यक्ष नारायणप्रसाद दाहालले उक्त प्रस्तावमाथि दफावार प्रारम्भ हुने जानकारी गराए। उनले उक्त प्रस्तावमाथि संशोधन प्रस्ताव दर्ता नभएको व्यहोरासमेत जानकारी गराए।  

प्रस्तावमाथि दलीय आधारमा छलफल भएको थियो। राष्ट्रियसभाले सो विधेयक पारित गरेर प्रतिनिधिसभामा फिर्ता पठाएको छ।
 
विधेयक प्रतिनिधिसभाबाट गत साउन ३० मा पारित भएको थियो। सो विधेयक २०७९ फागुन २५ मा प्रतिनिधिसभामा दर्ता भएको थियो। प्रतिनिधिसभामा उत्पत्ति भएको सो विधेयक सभामुख देवराज घिमिरेबाट प्रमाणित भएर प्रमाणीकरणका लागि राष्ट्रपतिसमक्ष जानेछ। 

राष्ट्रपतिबाट प्रमाणीकरण भएसँगै सो ऐन कार्यान्वयनमा आउनेछ। प्रतिनिधिसभाको अर्को बैठक यही भदौ ९ मा आइतबार अपराह्न १ः१५ बजे बस्नेछ।

भदौ ५, २०८१ बिहीबार १७:५०:१३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।