काँक्रो खेतीबाट डेढ लाखको खर्चमा ७ लाखसम्म आम्दानी गर्दै इलामका किसान

काठमाडौं : इलामको सूर्योदय नगरपालिका–१२ का रमेस गड्तौलाले यसवर्ष पाँच रोपनी जग्गामा काँक्रोखेती गरे। उत्पादन राम्रै भयो र आम्दानी पनि। 

'याम सकिनै लाग्यो। अन्तिम टिपाइ भइसक्यो, यसवर्ष राम्रैगरी काँक्रा बिक्री भए', उनले भने, 'झापाको चारआली र बिर्तामोड पुर्याउँदा कम्तीमा प्रतिगोटा ३० रूपैयाँदेखि ९० सम्ममा बिक्री हुन्छ।' 

उनले काँक्रो लगाउँदा एक लाख ५० हजार खर्च भएको बताए।

'छ/सात लाख आम्दानी भयो होला। हाम्रो गाउँमा धेरै किसानले काँक्रो लगाएका थिए। प्रायः सबैजसो किसानले कम्तीमा चार/पाँच सय काँक्रो बिक्री गरेका छन्', उनले सुनाए। 

उनले काँक्रोबाट आम्दानी राम्रो हुने भएकाले यो क्षेत्रका धेरै किसानले हरेक वर्ष खेती गर्ने गरेको बताए। 

सूर्योदय–१२ कै योगेन्द्र राई र सञ्जय राईले पनि काँक्रोखेती गरेका छन्।

'सुरूमा खडेरीले अलि सतायो, सिँचाइ कम भयो तर पनि दुई हजारजति काँक्रो फल्यो होला', उनले भने। 
   
अहिले सूर्योदयका वडावडामै कच्ची भएपनि बाह्रै महिना सवारीका साधन सञ्चालन हुनसक्ने सडक भएकाले गाउँगाउँबाट किसानलाई तरकारी बिक्री गर्न धेरै सजिलो छ। तर, उत्पादन भएपनि ढुवानी गर्न नसक्दा बारीमै कुहिने बाध्यता भने किसानलाई धेरै टरेको पाइन्छ।
 
अघिल्लोपटकको स्थानीय सरकारले नै नगरका १४ वटै वडामा ‘एक वडा–एक सडक’को नीति लिएर थालेको कम्तीमा तीन किलोमिटर कालोपत्र सडक निर्माणको काम अहिले पनि भइरहेको छ। दोस्रो कार्यकालमा आएको नगर कार्यपालिकाले पनि अघिल्ला काम र योजनालाई निरन्तरता दिँदै सबै वडाका सडकमा अहिले पनि नाली, ग्राभेल, पर्खाल र केही ठाउँमा कालोपत्रको काम गरिरहेको छ।

१८ किलोमिटर कालोपत्रको काम भइसकेको सूर्योदय नगरपालिकाका आर्थिक समिति संयोजक देवेन्द्र शर्मा आचार्यले बताए। उनका अनुसार अहिलेसम्ममा एक सय ३० किलोमिटर ग्राभेल सम्पन्न भएको छ। 

बाह्मासे सडकका लागि प्रत्येक वडाले बर्सेनि कम्तीमा ५० लाख बजेट विनियोजन गर्ने गरेका छन्। आवश्यकतानुसार वडाले एक करोडसम्म बजेट छुट्याउने र त्यसमा नगरपालिकाले पनि थप गर्दै गएको नगरप्रमुख रणबहादुर राईले जानकारी दिए। 

'कृषिजन्य उत्पादन गाउँमा छ, त्यसलाई बजारसम्म ढुवानी गर्न बाटो छैन, आफूले उत्पादन गरेको कृषि उपज कुहिएर नाश हुँदा सर्वसाधारणले आर्थिक क्षति व्यहोर्नुपरेको छ। अब विस्तारै गाउँमा सहज यातायातको पहुँच पुग्न थालेको छ। यातायात र ढुवानी अभावमा अब सूर्योदयका किसानले उत्पादन गरेको कृषि उपज नोक्सान हुन पाउने छैन,' उनले भने। 

वर्षायाम सुरू भएपछि विगत वर्षमा सडक हिलाम्मे भएर यातायात सुविधा नहुँदा यहाँका किसानले उत्पादन गरेको गोलभेँडा, इस्कुस, अकबरे, काँक्रो, बन्दालगायत कृषि उत्पादन बारीमै कुहिने गरेको थियो।

सूर्योदय–१२ का मलिम, आठघरे, याङ तरकारी उत्पादनका लागि राम्रा क्षेत्र हुन्। मलिममा अहिले गोलभेँडा राम्रो रहेको र आफैँले ढुवानी सेवा दिँदै आएको अर्का किसान राम राईले बताए। 

यहाँका किसानले काँक्रो, गोलभेँडा, इस्कुस, अकबरे, फर्सी, बन्दा, काउली, इस्कुसका टुप्पा, फर्सीका टुप्पालगायत तरकारी उत्पादन गरेर बिक्री गर्ने गरेका छन्।

भदौ ३, २०८१ मंगलबार १४:५७:४२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।