राजेश हमालको कमब्याक फिल्म ‘नरसिंहाः अवतार’मा सरोज खनालको इन्ट्री

काठमाडौं : निर्देशक दिवाकर भट्टराईले निर्देशन गर्न लागेको फिल्म ‘नरसिंहाः अवतार’का लागि कलाकारहरूको रोचक लाइनअप तयार हुनेक्रममा थप दुईजना कलाकारहरू फाइनल भएका छन्। 

एक्सन तथा सोसल ड्रामामा बन्ने यो फिल्मको शीर्षमध्ये एक भूमिकामा सरोज खनाल अनुबन्धित भएका छन्। फिल्ममा सरोजसँगै दीपा शाहीसँग पनि लिखित सम्झौता भइसकेको छ। 

निर्माणपक्षले यो फिल्ममा दीपा र सरोजको कस्तो भूमिका छ भन्ने विषयमा भने केही पनि खुलाइएको छैन। 

यही फिल्मबाट आठ वर्षपछि महानायक राजेश हमाल कमब्याक गर्दैछन्। आठ वर्ष भन्दा धेरै समयपछि हमाल फिल्ममा फर्किने खबरले यतिबेला नेपाली फिल्मवृत्त तताएको छ। 

क्याप्टेनपछि दिवाकरको फिल्ममा सरोजले अभिनय गर्न लागेका हुन्। फिल्ममा हमालपछि यसअघि नै नीति शाह, सनिशा भट्टराई अनुबन्धित भइसकेकी छन्। 

क्रिएटिभ सिने आर्टको प्रस्तुति रहने फिल्म यही भदौबाट छायांकनमा जाने तयारीमा रहेको छ। 

फिल्मको लगानी तीन करोडभन्दा माथि हुने बताइएको छ। 

भदौ १, २०८१ शनिबार २१:५८:२० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।