फ्राइडे रिलिज : सुरक्षाको ‘बुलाकी’ पुनः प्रदर्शन, दुई हिन्दी फिल्म पनि हलमै
काठमाडौं : हरेक शुक्रबार नेपाली फिल्म रिलिज हुने क्रमलाई निरन्तरता दिँदै आजबाट सुरक्षा पन्त अभिनित फिल्म ‘बुलाकी’ पुन: प्रदर्शनमा आएको छ।
यसअघि २०८० वैशाख १ गते सुपरहिट फिल्म ‘जारी’सँगै प्रदर्शनमा आएको फिल्मले त्यो समयमा उचित शो नपाएको भन्दै तेस्रो दिनमै हलबाट फिल्म उतारेको थियो। तर, आजबाट भने फिल्म पुनः हलमा प्रदर्शन भएको छ।
पश्चिम नेपालमा हुने जारी प्रथालाई समेटिएको फिल्ममा सुरक्षाका अलावा नरेन खड्का, विराज विष्ट, लक्ष्मी गिरी, प्रकाश कँडेल, सुशिल पोखरेल लगायतका कलाकारहरुको मुख्य भूमिका छ।
आज ‘बुलाकी’ बाहेक अन्य नेपाली फिल्महरु हलमा लागेका छैनन्।
कुनै पनि फिल्म प्रदर्शन नभएको मौका छोपी निर्देशक लक्ष्मण सुनारले फिल्म रिलिज गरेका हुन्। फिल्म पुनः प्रदर्शन गर्न लागेसँगै निर्माण टिमलाई फिल्मको प्रचारलाई प्राथमिकतामा राखेको थियो।
दुई साता अघि मात्र निर्माण टिमले फिल्मको नयाँ ट्रेलर र गीत समेत रिलिज गरेको थियो।
नेपाली फिल्म ‘बुलाकी’को अलावा आजैबाट दुई हिन्दी फिल्म ‘स्त्री २’ र ‘खेल खेल में’ प्रदर्शनमा आएका छन्।
स्त्री २ मा श्रद्धा कपुर, राजकुमार राव, पंकज त्रिपाठी लगायतका कलाकारको भूमिका हुँदा खेल खेल मेँ फिल्ममा अक्षय कुमार, तापसी पन्नु, वाणी कपूर लगायतका कलाकारको भूमिका छ।
यसका अलावा हलमा ‘डेडपुल एण्ड उल्भराइन’, ‘ब्रोन पिंक’, ‘घर ज्वाइँ’, ‘औरो में कहाँ दम था’, ‘कल्की’ र ‘डेस्पिकेबल मी’ नामक फिल्म पनि हलमा छन्।
साउन ३२, २०८१ शुक्रबार ०८:१४:५१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
