गठ्ठाघर दुर्घटनामा मारिएका चालक पुरुष, साथमा फेला पर्यो उत्तम कोइरालाको लाइसेन्स
भक्तपुर : भक्तपुरको गठ्ठाघरमा भएको दुर्घटनामा मारिएका स्कुटर चालक महिला नभएर पुरुष भएको प्रहरीले जानकारी दिएको छ।
दिनभर प्रहरीले मृतक महिला भएको दाबी गरेको थियो। आफन्त खोज्न आएको आधारमा महिलाको नाम समेत सार्वजनिक गरेको थियो। तर प्रहरीले जुन नाम सार्वजनिक गर्यो ती महिला आफैँ प्रहरी कार्यालय पुगेकी थिइन्।
अनि बिहीबार बेलुका प्रहरीले मृतक पुरुष भएको र उनको साथबाट सवारी चालक अनुमति पत्र समेत फेला परेको तर आफन्तले पहिचान नगरी नाम एकिन भन्न नसकिने बतायो।
भक्तपुरका प्रमुख जिल्ला अधिकारी रोशनीकुमारी श्रेष्ठले मृतक पुरुष भएको बताइन्। प्रहरीका अनुसार मृतकको साथबाट ओखलढुङ्गाका ४५ वर्षीय उत्तम कोइराला नाममा जारी सवारी चालक अनुमति पत्र भेटिएको छ।
घटनामा संलग्न ट्रक चालक सर्लाही मलङ्गवा नगरपालिका–२ का ३२ वर्षीय सतेन्द्र श्रेष्ठलाई प्रहरी नियन्त्रणमा लिइसकेको छ भने शव परीक्षणका लागि शिक्षण अस्पताल महाराजगन्जमा राखिएको छ।
साउन ३०, २०८१ बिहीबार २२:५७:१७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
