‘रेजोनेन्स अफ ह्युज’ले काठमाडौंको भिवान्ता क्रिएटिभ्समा नेपाली कलाको उत्सव मनाउँदै

काठमाडौं : चौधरी ग्रुप फाउण्डेसनको उन्नति कल्चरल भिलेजले ‘रेजोनेन्स अफ ह्युज’ नामक कला प्रदर्शनी भिवान्ता क्रिएटिभ्स सँगको सहकार्यमा १० अगस्ट २०२४ मा उद्घाटन समारोह सम्पन्न गरेको छ।

आठ जना प्रख्यात समकालीन नेपाली कलाकारहरूको कृति समेटिएको उक्त प्रदर्शनी १० अगस्ट २०२४ देखि ११ अक्टोबर २०२४ सम्म जारी रहनेछ।

कार्यक्रमको उद्घाटन पानस प्रज्वलनसाथै विशिष्ट पाहुनाहरूको मन्तव्यबाट भएको थियो। सिजी फाउण्डेसनका कार्यकारी निर्देशक सुरभि चौधरीले सहकार्य र साझेदारीले लक्ष्यमा पुग्नका लागि महत्त्वपूर्ण भूमिका रहेको सत्यतामा जोड दिइन्।

कार्यक्रमको अन्त्यमा सिजी ग्रुपका अध्यक्ष बिनोद चौधरीले समापन मन्तव्य दिँदै, उन्नति र यसको कला, शिल्प र संस्कृतिमा योगदान दिने प्रयासहरूलाई शुभकामना दिए।

होटल भिवान्ता काठमाडौंका महाप्रबन्धक रवि निश्चलले यो सहकार्यको बारेमा आफ्नो खुशी व्यक्त गर्दै उन्नति कल्चरल भिलेजको महत्त्वलाई उल्लेख गरे। सुर सुधाको मनमोहक संगीत प्रदर्शनले उक्त साँझलाई एक विशेष आयाम प्रदान गर्दै, उपस्थित सबैलाई अनुपम अनुभव दिलायो।

उन्नति कल्चरल भिलेजका कला र संस्कृति व्यवस्थापक रोशन भण्डारीद्वारा क्युरेट गरिएको ‘रेजोनेन्स अफ ह्युज’ले नेपाली संस्कृति, परम्परा र दैनिक जीवनको विविध कलात्मक अभिव्यक्तिहरूको आकर्षक अन्वेषण प्रदान गर्दछ।

प्रदर्शनीले परम्परागत र आधुनिक तत्त्वहरूलाई सुमधुर रूपमा संयोजन गर्दै नेपालका समृद्ध सांस्कृतिक सम्पदाको उत्सव मनाउने एक समावेशी अनुभव सिर्जना गर्दछ।

साउन २७, २०८१ सोमबार १३:५८:४५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।