डेब्यु फिल्म नै फ्लप भए पनि अभिनेत्री नीतिलाई फाइदै भयो
काठमाडौँ : दुई वर्षअघि फागुनमा फिल्म ‘क्यामिनो’मा नीति शाहलाई हिरोइनमा अनुबन्ध गरिएको समाचार आयो। फिल्मको पोस्टरमा उनको तस्बिर सहित अनुबन्ध गरिएको निर्देशक दीपक वलीले सूचना सार्वजनिक गरेका थिए। तर फिल्म बनेन।
त्यही समयमा नीति ‘एक्स नाइन’मा अनुबन्ध भएको दाबी आए। हल्ला मात्रै चल्यो तर फिल्म अहिलेसम्म फ्लोरमा गएको छैन।
उनी अनुबन्ध भएका फिल्म फ्लोरमै नगएपछि अनलक्की अभिनेत्री भन्न थालियो। अनि कसैलाई थाहै नदिई फिल्म ‘खजुरे ब्रो’मा काम गरिन्।
फिल्ममा तीन दिन काम गरिसकेपछि निर्माण टिमले धुम्बाराही चोकैका क्याफेमा कलाकार चिनायो। त्यसपछि उनीहरू फिल्म खिच्न धरान पुगे। यो बेला नीति निकै उत्साहित थिइन्। फिल्ममा डेब्यु गर्नै कठिन परेको अवस्थामा उनले ‘खजुरे ब्रो’मा अभिनय गरिन्। धन्न फिल्म निर्माण भयो अनि रिलिज पनि।
तर डेब्यु फिल्म नै फ्लप भइदियो। पहिलो फिल्म नै फ्लप भएपछि तत्काल रन्थनिएकी नीतिलाई अन्ततः त्यो फिल्म फापेको देखियो।
अहिले उनी एकपछि अर्को फिल्ममा काम गरिरहेकी छन्। हालसालै उनले वसन्त निरौलाको निर्देशनमा ‘ज्वाइँ साव’मा अभिनय गरेकी छन्। यस फिल्ममा उनको अपोजिटमा कमेडियन जितु नेपाल छन्। उनले यही समयमा सबिर श्रेष्ठको फिल्म ‘रुखान’मा अनुबन्ध भइसकेकी छिन्। यो फिल्मको छायांकन केही समय पर धकेलिएपछि उनी ‘नरसिंहा अवतार’ अनुबन्ध भएकी छन्।
एक सातापछिबाट नै छायाङ्कनमा जाने भनिएको यो फिल्मलाई दिवाकर भट्टराईले निर्देशन गर्दैछन्। यही फिल्मबाट हमाल ८ वर्षपछि फिल्ममा कमव्याक गर्न लागेका हुन्।
अरू अभिनेत्रीको हिट फिल्म हुँदा नि काम पाउन सकस परिरहेको अवस्थामा नीतिलाई एक पछि अर्को फिल्म हातमा परेपछि अनलक्की होइन,लक्की हिरोइन भन्दा अब के फरक पर्ला र?
साउन २५, २०८१ शुक्रबार १९:०९:१३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
