हेलिकप्टर दुर्घटनापछि मन्त्री पाण्डेद्वारा एक साताका लागि पूर्वनिर्धारित कार्यक्रम स्थगित, हवाइ सुरक्षामा ध्यान दिन निर्देशन
काठमाडौं : संस्कृति, पर्यटन तथा नागरिक उड्डयनमन्त्री बद्री पाण्डेले एक साताका लागि तय भएका पूर्वनिर्धारित कार्यक्रम स्थगित गरेका छन्।
करीब १५ दिनको अवधिमा दुई वटा हवाइ दुर्घटना हुनु दुर्भाग्यपूर्ण भएको निश्कर्ष सहित उनले हवाई सुरक्षाका विषयमा केन्द्रित भई आवश्यक कदम चाल्न मन्त्रालय र मातहतका निकायहरूलाई परिचालन गर्ने बताए।
यस अवधिमा हवाइ सुरक्षाको विषयलाई उच्चतम् प्राथिमकतामा राख्दै तत्तकालीन, मध्यकालीन र दीर्घकालीन सुधारका पहल थालनी गर्ने समेत उनको भनाइ छ।
नुवाकोटको शिवपुरीमा हेलिकप्टर दुर्घटना हुँदा एक नेपालीसहित पाँच जनाको मृत्यु भएपछि बुधबार साँझ मन्त्रीको सचिवालयका तर्फबाट प्रेस नोट जारी यस्तो बताइएको हो।
हेलिकप्टर दुर्घटनाको उद्धारमा अस्वभाविक ढिलाइ भएको भन्ने सम्बन्धमा प्रकाशित समाचारप्रति गम्भीर ध्यानाकर्षण भएको जनाउँदै मन्त्री पाण्डेले 0नागरिक उड्डयन प्राधिकरण (क्यान) लगायतका सम्बन्धित पदाधिकारीहरूसँग जानकारी लिएका थिए।
सो क्रममा प्राविधिक कारणले दुर्घटना एकीन गर्न केही समय लागेको र दुर्घटनास्थल पहिचान हुनासाथ प्रतिकुल मौसमका बावजुत उद्धारका लागि प्रभु हेलिकप्टर कम्पनीको हेलिकप्टर पठाइएको सो हेलिकप्टर फिर्ता हुन नसकी राती पनि सोही स्थानमा नै रहेको जानकारी गराएका थिए।
दुर्घटनामा ज्यान गुमाएकाहरूको आत्माको चिर शान्तिको कामना गर्दै शोक सन्तप्त परिवारप्रति हार्दिक समवेदना व्यक्त गर्दै मन्त्री पाण्डेले नेपाली उड्डयन क्षेत्रले भोग्नु परेको असहजताको समाधान खोज्न सबैको साथ, सहयोग र सुझावको अपेक्षा गरेका छन्।
एयर डाइनेस्टीको ९ एन–एजेडी कलसाइन हेलिकप्टर बुधबार दिउँसो नुवाकोटको शिवपुरी गाउँपालिका–७ स्थित सूर्यचौर भन्ने स्थानमा दुर्घटनाग्रस्त भएको हो। दिउँसो १ बजेर ५४ मिनेटमा भक्तपुरको नलिनचोकबाट रसुवाको स्याफ्रुबेंसीका लागि उडान भरेको हेलिकप्टर दिउँसो २ बजेर १४ मिनेटमा दुर्घटनाग्रस्त भएको थियो।
हेलिकप्टर उडान भरेको तीन मिनेटपछि सम्पर्कविहीन भएको नेपाल नागरिक उड्डयन प्राधिकरण (क्यान)ले जनाएको छ। दुर्घटना लगत्तै खोज तथा उद्धारका लागि सुरक्षाकर्मीसहितको टोली परिचालन गरिएको थियो।
सबैको शव सङ्कलन गरी पोस्टमार्टमका लागि त्रिवि शिक्षण अस्पताल महाराजगन्जमा राखिएको नेपाल नागरिक उड्डयन प्राधिकरण, खोज तथा उद्धार समन्वय केन्द्रले विज्ञप्तिमार्फत जनाएको छ।
दुर्घटनाको छानबिन गर्न आयोग पनि गठन गरिएको छ। मन्त्रिपरिषद्को सिंहदरबारमा भएको आकस्मिक बैठकले नेपाली सेनाका वरिष्ठ पाइलट सुवास थापाको संयोजकत्वमा तीन सदस्यीय जाँचबुझ आयोग गठन गरिएको हो।
साउन २३, २०८१ बिहीबार ०७:४०:४३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
