प्रधानमन्त्री ओलीको अभिनय रहेको फिल्मको पोस्टर सार्वजनिक

काठमाडौं : प्रधानमन्त्री केपी शर्मा ओलीको भूमिका रहेको फिल्म ‘नमेटिने घाउ’को पोस्टर सार्वजनिक भएको छ।

एसिड आक्रमणमा परेका ३३ जना पीडितहरूको वास्तविक घटनामा आधारित फिल्मको पोस्टर सोमबार चलचित्रका निर्माता तथा निर्देशक रमित ढुंगानाले सामाजिक सञ्जाल मार्फत सार्वजनिक गरेका हुन्।

सार्वजनिक पोस्टरमा प्रधानमन्त्री ओलीलाई बढी महत्वका साथ देखाइएको छ भने साथमा केही पीडित र प्रहरी अफिसरको तस्बिर समेत प्रयोग गरिएको छ।

फिल्ममा प्रधानमन्त्री ओली प्रधानमन्त्रीकै भूमिकामा छन् भने पूर्वप्रधानमन्त्री माधवकुमार नेपाल, सांसदहरू देवेन्द्र पौडेल र ज्ञानेन्द्र शाही लगायत नेपाल प्रहरीका केही अफिसरहरूको पनि भूमिका छ।

यसका अलावा फिल्ममा एसिड आक्रमणमा परेका वास्तविक पीडितहरूले समेत अभिनय गरेका छन्। भदौ ७ गते प्रदर्शन हुने फिल्मलाई निर्माता तथा निर्देशकले ‘भाग १’ भनेका छन्।

फिल्मको लागि भनेर केही दिनअघि मात्र प्रधानमन्त्री ओलीले डबिङ समेत गरेका थिए। 

साउन २१, २०८१ सोमबार ११:१२:५६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।