ग्लोबल टी२० मा सन्दीप र दीपेन्द्र सम्मिलित नाइट्सको पहिलो जित

काठमाडौं : क्यानडामा जारी ग्लोबल टी२० मा नेपाली दुई खेलाडी सम्मिलित भानकुभर नाइट्सले पहिलो जित निकालेको छ।

आफ्नो सातौं खेलमा मोन्ट्रियल्स टाइगरलाई पराजित गर्दै नाइट्सले जारी प्रतियोगितामा पहिलो जित निकालेको हो।

ब्राम्पटन क्रिकेट मैदानमा टस हारेर पहिला ब्याटिङमा तानिएको टाइगर्स १९.२ ओभरमा अलआउट भयो।

उसका लागि अजमतुल्लाह ओमरजाइले ३०, शेरफान रथरफोर्ड २२ र टिम सेफर्टले १० रन बनाउनुबाहेक अन्य खेलाडीले दोहोरो अंकमा रन जोड्न सकेनन्।

बलिङतर्फ नाइट्सका मोहम्मद अमीरले तीन विकेट लिँदा सन्दीप लामिछाने, हर्ष थाकर र ड्वेयन प्रेटोयसले समान दुई–दुई विकेट लिए।

११० रनको झिनो लक्ष्य पछ्याएको नाइट्सले १८.४ ओभरमा पाँच विकेट गुमाएर पूरा गर्यो। उसका लागि रीजा हेन्ड्रिच ३९, उसमान ख्वाजा ३१, रिची बेरिङ्टन १७ रन बनाए।

बलिङतर्फ टाइगर्सका अजमतुल्लाह ओमरजाइ र जेरार्ड इरासमसले समान दुई–दुई विकेट लिँदा कोर्बिन बोस्चले एक विकेट हात पारे।

अहिलेसम्म खेलेको सात खेलमा सात खेलमध्ये नाइट्स एक खेलमा मात्र विजयी भएको हो। विजयी भए पनि नाइट्स पुच्छारमै कायम छन्।

साउन २०, २०८१ सोमबार ०७:५९:२३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।