दिल्लीमा भारी वर्षाका कारण दुई जनाको मृत्यु, विद्यालय आजसम्मका लागि बन्द

एजेन्सी : भारी वर्षाका कारण बुधबार राति दिल्लीमा दुई जनाको मृत्यु भएको छ। आम आदमी पार्टीका सांसद कुलदीप कुमारले सामाजिक सञ्जालमार्फत घटनाबारे जानकारी दिएका हुन्।

उनले सामाजिक सञ्जालमा लेखेका छन्, ‘आज दिल्ली र उत्तर प्रदेशको खोडा कोलोनीको सिमानामा डीडीएले निर्माण गरिरहेको नालामा कुनै किसिमको ब्यारिकेडिङ नहुँदा खसेर एक महिला र उनको साढे दुई वर्षकी छोरीको मृत्यु भएको छ।’

यसबाहेक, समाचार एजेन्सी एएनआईका अनुसार, दिल्लीको दर्यागञ्ज क्षेत्रमा वर्षाका कारण एक निजी विद्यालयको पर्खाल पनि भत्किएको छ। दिल्लीमा भारी वर्षाको पूर्वानुमानलाई ध्यानमा राख्दै विद्यालयहरू बन्द गर्न आदेश दिइएको छ।

दिल्ली सरकारका मन्त्री आतिशीले सामाजिक सञ्जालमा लेखेकी छन्, ‘दिल्लीमा बुधबार साँझदेखि परेको भारी वर्षा र बिहीबार पनि भारी वर्षाको सम्भावनालाई ध्यानमा राख्दै दिल्लीका सबै सरकारी र निजी विद्यालयहरू १ अगस्टमा बन्द रहनेछन्।’

भारी वर्षाका कारण दिल्लीका धेरै ठाउँमा जलमग्न पनि देखिएको छ। एएनआईले सार्वजनिक गरेको भिडियोमा पर्खाल गाडीको माथिबाट पानी खसेको देख्न सकिन्छ।

यसअघि दिल्लीको राजेन्द्र नगर क्षेत्रमा रहेको एक कोचिङ इन्स्टिच्युटको बेसमेन्टमा पानी जमेर सिभिल सेवाको तयारी गरिरहेका तीन विद्यार्थीको मृत्यु भएको थियो।

यही विषयलाई लिएर विद्यार्थी आन्दोलनमा उत्रिएका छन्। दिल्ली सरकारका मन्त्री आतिशीले पनि बुधवार विद्यार्थीहरूलाई भेटेकी थिइन्।

साउन १६, २०८१ बिहीबार ०९:४०:२४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।