कट्रिनासँग दाँज्दा जसको करिअरै खत्तम भयो

एजेन्सी : जरीन खान बलिउडकी ती अभिनेत्रीहरू मध्ये एक हुन् जसलाई प्रारम्भमा कट्रिना कैफको विकल्पको रूपमा हेरिएको थियो। कट्रिना जस्तै देखिने पहिचानबाटै उनी बलिउडमा प्रवेश गरेकी थिइन्। उनले आफ्नै पहिचान बनाउन वर्षौँसम्म मेहनत गरिन्। तर सफल हुन सकिनन्। उनमा अहिले पनि त्यसमा पछुतो भने छ।

जरीन खान अहिले कामहिन छिन्। हालै उनले आफ्नो करिअर अगाडि नबढ्नुको कारण कट्रिना कैफ भएको बताइन्।  हालै जरीन खान भारती सिंह र हर्ष लिम्बाचियाको पडकास्टमा पुगेकी थिइन्। यो पडकास्टमा उनले आफ्नो करियरको बारेमा कुरा गर्दै भनिन्, सलमान खानको फिल्म वीर रिलिज भएपछि मेरो जीवन धेरै खराब भयो। मानिसहरूले मलाई नक्कली कट्रिना कैफको नामले ट्रोल गरिरहेका थिए। यो फिल्मले मेरो पूरै जीवन बदलिदियो। मेरो तुलना कट्रिना कैफसँग भएकोमा म खुसी थिएँ।' 

सलमान खान र कट्रिनाको सम्बन्ध बिग्रिएको अवस्थामा जरिन फिल्मी दुनियाँमा प्रवेश गरेकी थिइन्। कट्रिना जस्तै देखिने भएकाले नै सलमानले उनलाई अभिनय गराएको चर्चाहरू भए। त्यसले बिस्तारै जरिनको करिअरमा नकारात्मक प्रभाव पर्दै गयो।

'त्यो बेला म निकै मोटी थिएँ। यस्तो अवस्थामा मेरो तुलना कट्रिना कैफसँग हुनु ठुलो कुरा थियो। यद्यपि, मेरो केसमा यसको उल्टो प्रभाव पर्यो। म उद्योगमा हराएको बच्चा जस्तै महसुस गर्दै थिएँ। मानिसहरूलाई लाग्न थाल्यो कि सलमान खानको कारणले ममा घमन्ड आउँदै छ' उनले भनिन्।

समस्या बढ्दै जाँदा आफू घरबाट बाहिर निस्कन पनि डराउने अवस्था आएको बताइन्। लुगाको बारेमा अशिष्ट टिप्पणी गर्ने, विचित्र विचित्र नामहरूले बोलाउँदा निकै समस्यामा परेको र आफूले काम समेत नपाएको उनले खुलाइन्। उनको निष्कर्षमा यी सबैको कारण कट्रिना कैफसँगको तुलना नै थियो। 

साउन १६, २०८१ बुधबार २३:१५:५१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।