‘पसिना’ले डुबाएको अनुलाई ‘ईश्वर’ले पनि उतार्न सकेन

काठमाडौँ : पाँच वर्ष अघि अभिनेत्री अनु शाहले अभिनय गरेको फिल्म ‘पसिना’ प्रदर्शनमा आयो। मजदुरको कथामा आधारित फिल्म भनेर खुबै प्रचार गरियो। फिल्मलाई मजदुर दिवसकै अवसर पारेर अर्थात् वैशाख २७ गते रिलिज पनि भयो।

फिल्मले हलमा पानी समेत भन्न पाएन। अभिनेत्री शाहको करिअरमा धक्का लाग्यो। उनी बेरोजगार भइन्।

केही म्युजिक भिडियोमा फाट्टफुट्ट देखिइरहिन् उनी। तर त्यसले पुन ठुलो पर्दामा फर्काएन। उनी अभिनेता सविन श्रेष्ठसँगको सम्बन्धले चर्चामा आइन् बरु।

उनीहरू आफुहरुबीच ‘अफेयर चलेको छैन’ नै भन्थे। तर कोभिडपछि उनीहरूले सँगै भ्लग बनाउन थाले। अनि सम्बन्ध समेत खुलाए।

पाँच वर्षको पर्खाइपछि फिल्म ‘ईश्वर’मा अभिनय गर्ने मौका पाइन्। अन्तिम अवस्थामा फिल्ममा अनुबन्ध भएकी थिइन् उनी। गत शुक्रवार फिल्म रिलिज भएको थियो।

फिल्मको प्रचारमा उनले अब त बिहे गर्ने हो भन्दै हिँडेकी पनि थिइन्। तर उनको अफेयर्समा जति चासो देखाएका थिए गसिपवालाहरुले विवाहमा चासै देखाएनन्।

कमैले थाहा पाए यो फिल्म रिलिज भएको। दोस्रो फिल्मको व्यापार पनि चुर्लुम्मै भयो। ‘पसिना’ले डुबाएको अनुलाई ‘ईश्वर’ले पनि उतार्न सकेन। 

साउन १३, २०८१ सोमबार १९:५७:४७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।