बंगलादेशमा शेख हसिनाको सम्बोधनपछि थप हिंसा भड्कियो, अहिलेसम्म २५ जनाको मृत्यु
![बंगलादेशमा शेख हसिनाको सम्बोधनपछि थप हिंसा भड्कियो, अहिलेसम्म २५ जनाको मृत्यु](https://ukeraa.prixacdn.net/media/albums/bangladesh_jhadap_4ovaQ9Y1xd.webp )
एजेन्सी : आरक्षण विरुद्ध चलिरहेको राष्ट्रव्यापी आन्दोलनमा बंगलादेशका विभिन्न भागमा हालसम्म कम्तीमा २५ जनाको मृत्यु भइसकेको छ। यसबाहेक सयौं मानिस घाइते भएका छन्। आन्दोलन र हिंसा निरन्तर बढ्दै गएको छ।
धेरै ठाउँमा प्रदर्शनकारीहरू प्रहरी बलसँग हिंसात्मक झडपमा आमनेसामने छन्। देशका धेरै ठाउँमा इन्टरनेट सेवा बन्द गरिएको छ। आन्दोलनकारीले सरकारी जागिरमा आरक्षण खारेज गर्नुपर्ने माग गरेका छन्।
प्रधानमन्त्री शेख हसिनाले बुधबार राष्ट्रका नाममा सम्बोधनपछि आरक्षण विरोधी आन्दोलनकारीहरूले झनै आक्रामक भए। त्यसपछि विवाद झन् बढेको र प्रदर्शनकारीहरूले देशभर ‘पूर्ण बन्द’को आह्वान गरेका छन्। रातिदेखि नै देशका विभिन्न स्थानमा हिंसात्मक प्रदर्शन सुरु भएको छ।
प्रदर्शनकारीहरूले बिहीबार बंगलादेशको मुख्य सरकारी प्रसारक बिटिभीको मुख्यालयमा आगजनी गरेका छन्। आगजनीबाट ‘धेरै मानिस’ कार्यालयभित्र फसेको नेटवर्कले बताएको छ। स्टेसनका एक अधिकारीले नाम उल्लेख नगर्ने सर्तमा सयौँ प्रदर्शनकारीहरूले परिसरमा आक्रमण गर्दै कम्तीमा ६० सवारी साधन र एउटा कार्यालय भवनमा आगो लगाएको बताए
एकातिर आरक्षणको विरोध गर्नेहरू सडकमा उत्रिए भने अर्कोतिर सत्तारुढ दलका विभिन्न संघसंस्था पनि सडकमा उत्रिदा राजधानी ढाकासहित विभिन्न क्षेत्रबाट मृत्युको खबर आउन थालेका हुन्।
प्रधानमन्त्री शेख हसिनाले प्रदर्शनकारीहरूलाई धैर्य गर्न आग्रह गर्दै उनीहरूलाई अदालतमार्फत ‘न्याय’ पाउने आश्वासन दिइन्। उनले जनतालाई न्यायिक प्रक्रियामा विश्वास गर्न पनि आग्रह गरिन्।
सरकारले शैक्षिक संस्था बन्द र विश्वविद्यालयका आवासीय छात्रावास खाली गरिदिए पनि आन्दोलनको चित्र यथार्थमा बदलिएको छैन। तर, आरक्षण विरोधीहरूले प्रधानमन्त्रीको भाषणबाट आफूले अपेक्षा गरेको कुरा पूरा हुन नसकेको बताएका छन्।
बिहीबार बिहानैदेखि ढाकाका विभिन्न क्षेत्रमा आरक्षण विरोधी प्रदर्शनकारीहरू सडकमा उत्रिएका थिए। ढाका क्यान्टोनमेन्ट नजिकै रहेको ईसीबी कम्प्लेक्समा ठूलो मात्रामा प्रदर्शन भइरहेका छन्।
त्यहाँका जनताले पनि आरक्षण व्यवस्था सुधारको पक्षमा नारा लगाएका थिए। सोही क्रममा विद्यार्थीले केही गाडीमा तोडफोड र आगजनी गरेका थिए।
आरक्षण सुधार आन्दोलनको विषयमा प्रधानमन्त्रीले बुधबार राष्ट्रका नाममा गरेको सम्बोधनमा केही विद्यार्थीले आपत्ति जनाएका छन्।
आफूलाई निजी विश्वविद्यालयको विद्यार्थी भनिरहेका अलीम खानले भने, ‘प्रधानमन्त्रीको भाषण हामीलाई मान्य छैन। एकातिर उहाँले विद्यार्थीलाई शान्ति र संयम अपनाउन आग्रह गरिरहनुभएको छ भने अर्कोतर्फ प्रहरी र बिजीबीले छात्रा लिगका सदस्यविरुद्ध कडा आलोचना गरिरहनुभएको छ।यो सरकारको दोहोरो चरित्र भयो।’
साउन ३, २०८१ शुक्रबार ०८:१९:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।