‘पुरुष विदेशमा छन्, देश विकासमा महिलाको भूमिका अहम छ’

काठमाडौं : नेपाली कांग्रेसका प्रवक्ता प्रकाशशरण महतले देशको विकासका लागि महिलाहरूको भूमिका अहम रहेको बताएका छन्।

बुधबार नेपाल महिला संघको केन्द्रीय कार्यालयको निर्माण गरिने नयाँ भवनको शिल्यानास कार्यक्रमलाई सम्बोधन गर्दै पूर्व अर्थमन्त्री समेत रहेका महतले देशमा महिलाको संख्या पुरुषको तुलनामा धेरै रहेको भन्दै देशको विकासका लागि महिलाको भूमिका महत्वपूर्ण भएको बताए।

यस्तै, उनले महिलाहरूलाई राष्ट्रिय राजनीतिमा जोड्ने सवालमा महिला संघ कडी भएको पनि बताए।

उनले भने, ‘देशमा पुरुषको तुलनामा महिलाको उपस्थिति बलियो छ। पुरुष दाजुभाइहरू कामको शिलशिलामा विदेशमा छन्। यस कारण देश विकासका लागि महिलाहरूको भूमिका अहम छ। महिलाहरूलाई राष्ट्रिय राजनीतिमा जोड्ने कडीका रूपमा महिला संघ रहेको छ। महिला संघको भवनको विस्तार आजबाट थालनी भएको छ। अब यसैगरी महिला संघको संगठन विस्तार हुनेछ।’

संगठनका सबै सदस्य मिलेर महिला संघको देशव्यापी संगठन विस्तारमा लाग्नुपर्ने महतको भनाइ थियो।

उनले पार्टीको भातृ संगठन महिला संघको माध्यमबाट पार्टीमा ठुलो संख्यामा महिला राजनीतिज्ञ जोड्न सफल हुने भएका कारण सबैले यसका लागि आफ्नो आफ्नो क्षेत्रबाट सहयोग गर्न आग्रह पनि गरे।

साउन १, २०८१ बुधबार १२:४९:४७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।