राजीनामा नदिएर प्रधानमन्त्रीले संविधानमा ‘प्वाल’ पार्न खोज्नुभयो : एमाले सांसद गैरे

काठमाडौं : एमालेका सांसद ठाकुरप्रसाद गैरेले प्रधानमन्त्री पुष्पकमल दाहाल प्रचण्ड अल्पमतमा परिसक्दा पनि राजीनामा नदिएर संविधानमा ‘प्वाल’ पार्न खोजेको आरोप लगाएका छन्।

सोमबार प्रतिनिधि सभा बैठकको आकस्मिक समयमा बोल्दै उनले सरकारले बहुमत गुमाएपछि कुनै धारा, उपधारा खोज्नुपर्ने कारण नरहेको भन्दै प्रधानमन्त्री एक मिनेट पनि बस्न नैतिक आधार नरहेको बताए। 

उनले भने, ‘आज देशमा यो तहको परिस्थिति बनिरहेको बेला प्रधानमन्त्रीज्यू धारापानी खोज्दै हुनुहुन्छ। संविधानमा प्वाल खोज्दै हुनुहुन्छ। सरकारलाई फेरि अस्थिरतातर्फ, बेथितितर्फ, विभाजनतर्फ लैजान सकिन्छ कि भनेर प्रयत्न गर्दै हुनुहुन्छ र यहीँ सदनमा पनि अनेकन् तर्क, विर्तकहरू गर्ने कोसिस गरिँदैछ। लोकतान्त्रिक शासन व्यवस्थामा सरकार अल्पमतमा परिसकेपछि, बहुमत गुमाएपछि कुनै धारा, उपधारा खोज्नुपर्ने कारण छैन। प्रधानमन्त्री एक मिनेट पनि बस्ने नैतिक आधार रहँदैन।’

उनले सरकार रोम जलिरहेको बेला राजा निरोले बाँसुरी बजाएर बसेको भनेजस्तै देशमा सरकार घोर अल्पमतमा परेको भन्दै व्यङ्ग्य गरे।  

असार २४, २०८१ सोमबार १३:१२:५६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।