‘मध्यरातमा एमाले र कांग्रेसले शान्ति प्रक्रिया उल्ट्याउन षड्यन्त्रकारी सहमति गरे’

काठमाडौं : माओवादी केन्द्रका महासचिव देव गुरुङले एमाले र कांग्रेसले मध्यरातमा षड्यन्त्रकारी ढङ्गले संविधान शंसोधनको गर्ने सहमति गरेर मुलुकलाई प्रतिगमनको दिशातिर लगेको बताएका छन्। 

बुधबार काठमाडौंमा आयोजित कार्यक्रममा एक बोल्दै उनले संविधानबारे सरोकारवालासँगको छलफल वा परामर्शको प्रक्रियाबाट गएर संविधान संशोधनको दिशाबाट जानुको सट्टामा मध्यरातमा षड्यन्त्रकारी ढङ्गले संविधान शंसोधन गर्ने कुरा उठाइरहेको बताए। 

उनले भने, ‘मध्यरातमा नेपाली कांग्रेस र एमालेबीचमा सरकार गठनको लागि जुन सहमति भयो भनेर मिडियामा आइरहेको छ, त्यो नेपालको राजनीतिक इतिहासमा एउटा परिघट्ना हो। यसलाई समग्रतामा प्रतिगमनको दिशातिर अघि बढिरहेको भन्ने थाहा हुन्छ। संविधानका सरोकारवालासँग छलफल परामर्शको प्रक्रियाबाट गएर संविधान शंसोधनको दिशाबाट जानुको सट्टामा मध्यरातमा अदृश्य रुपमा षड्यन्त्रकारी ढङ्गले अघि बढ्नु सान्दर्भिक होइन।’

शान्ति प्रक्रिया पश्चात् प्राप्त गरेका उपलब्धिहरूलाई नै निशाना गरेर त्यसलाई उल्ट्याउने कोणबाट संविधान शंसोधनको चर्चा भएको उनको भनाइ छ। 

उनले वर्तमान उपलब्धी उल्टाएर ०४७ सालको संविधानको दिशामा लान खोजेको त होइन भन्दै आशंका व्यक्त गरे।  

असार १९, २०८१ बुधबार १८:०२:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।