प्रचण्डले प्रधानमन्त्रीबाट राजीनामा नदिने

काठमाडौं : माओवादी केन्द्रले प्रधानमन्त्री पुष्पकमल दाहाल ‘प्रचण्ड’ले राजीनामा नदिने निर्णय गरेको छ।

मंगलबार प्रधानमन्त्री निवास बालुवाटारमा बसेको माओवादी केन्द्रको पदाधिकारी बैठकले यस्तो निर्णय गरेको सचिव देवेन्द्र पौडेलले जनानकारी दिए। प्रचण्ड माओवादी केन्द्रका अध्यक्ष हुन्।

‘प्रधानमन्त्रीले गलेर छोड्ने कुरा हुँदैन। गणित शो गर्न जाने, संसद फेस गर्ने र विश्वासको मत लिने कुरामा प्रधानमन्त्रीले कुरा राख्नुभएको छ’, उनले भने।

बैठकले राजीनामा नदिई विश्वासको मतको सामना गर्ने निर्णय गरेको हो। यस्तो अवस्थामा वर्तमान सरकार नै अबको ३० दिनसम्म रहनेछ।

उनले विश्वासको मत लिएर नपाएको अवस्थामा संविधानत: धारा ७६ को उपधारा ३ मा जानुपर्ने हुन्छ। उक्त धारा अनुसार सबैभन्दा ठूलो दलको प्रधानमन्त्रीको रूपमा देउवा प्रधानमन्त्री बन्ने अवस्था बन्छ।

तर, ओली प्रधानमन्त्री बन्ने बाटो भनेको उपधारा २ र ५ बाट मात्र हो। यस्तो अवस्थामा ओलीको रणनीति कस्तो रहन्छ, हेर्न बाँकी नै छ।

सोमबार मध्यरातमा दुई ठूला दलहरूबीच नयाँ सरकार गठन गर्ने समझदारीपछि प्रचण्ड नेतृत्वको सरकार अल्पमतमा परेको छ।

एमालेका मन्त्रीहरूले आजै सरकारबाट राजीनामा दिने तयारी गरेका छन् भने रास्वपाबाट मन्त्री बनेकाहरू पनि नयाँ सरकार बन्ने अवस्थामा सरकारबाट बाहिरिने बताइसकेको छ।

असार १७, २०८१ मंगलबार ११:३२:३० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।