अन्तर्राष्ट्रिय खुला भेट्रान एथलेटिक्स प्रतियोगितामा नेपालका बुद्धवीर र धर्मलाई स्वर्ण
![अन्तर्राष्ट्रिय खुला भेट्रान एथलेटिक्स प्रतियोगितामा नेपालका बुद्धवीर र धर्मलाई स्वर्ण](https://ukeraa.prixacdn.net/media/albums/buddabir_and_dharmabir_SWGjNZpXkJ.jpg )
काठमाडौं : अन्तर्राष्ट्रिय खुला भेट्रान एथलेटिक्स प्रतियोगितामा अन्तर्गत नेपाली भेट्रान धावक बुद्धवीर लामा र धर्म महर्जनले स्वर्ण जितेका छन्।
बंगलादेशको ढाकामा भइरहेको प्रतियोगिताको ६५ वर्षमाथि ५ हजार मिटर दौडमा बुद्धवीरले स्वर्ण जिते। गीतकारसमेत रहेका उनले निर्धारित दूरी २२ मिनेट ०३ सेकेन्डमा पूरा गरे।
सोही दूरीको ५० वर्षमाथि धर्मले १७ मिनेट ८ सेकेन्डमा दौड पूरा गर्दै पहिलो भए। धर्मले प्रतिस्पर्धा गरेको स्पर्धामा नेपालकै रैवत दाहाल दोश्रो भए। उनले निर्धारित दूरी तय गर्न १७ मिनेट ५० सेकेन्ड समय लगाए।
नेपालले थप १ कांस्य पनि जित्यो। ५५ वर्षमाथि ५ हजार मिटर दौडमा दीपककुमार रन्जितले कांस्य प्राप्त गरे। उनले निर्धारित दूरी २० मिनेट १९ सेकेन्डमा तय गरे।
प्रतियोगितामा नेपालबाट ६ खेलाडी सहभागी छन्। पुष्पलाल श्रेष्ठले ६५ वर्षमाथि १० हजार मिटर दौड तथा लाक्पा शेर्पा लामाले ४० वर्षमाथि १० हजार मिटर दौडमा प्रतिस्पर्धा गर्ने छन्।
उक्त दौड शनिबार हुने टोलीको नेतृत्वसमेत गरेका बुद्धवीरले जनाएका छन्। शनिबारै धर्मले १० हजार मिटर दौडमा पनि प्रतिस्पर्धा गर्ने छन्।
असार १२, २०८१ बिहीबार १६:१३:०४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।