'सरकार र मन्त्रीहरुकै कारण संघीयता र व्यवस्थामाथि प्रश्न उठ्यो'

काठमाडौं : कांग्रेस सांसद प्रदीप पौडेलले सरकार र मन्त्रीहरूको कारण सुशासन खलबलिएको, संघीयता र व्यवस्थामाथि प्रश्न उठेको बताएका छन्। उनले विगत र अहिलेका सरकार र मन्त्रीहरूको कारण संघीयता र व्यवस्थामाथि प्रश्न उठिरहेको आरोप लगाए।

मंगलबार प्रतिनिधि सभाको जारी विनियोजन विधेयकमाथिको मन्त्रालयगत छलफलमा सहभागी उनले बजेट विनियोजनले कानूनी मापदण्ड र मर्यादालाई उल्लंघन गर्ने प्रतिस्पर्धा गरिरहेको बताए।

उनले अघिल्लो पटक सांसद र मन्त्रीले तीनवटा क्षेत्रमा धेरै बजेट विनियोजन गर्दा निकै टिक टिप्पणी भएको स्मरण गराउँदै त्यसबाट सिक्नुपर्नेमा उल्टो आर्थिक अनुशासनलाई पालना नगरेर त्यो भन्दा बढी निर्वाचन क्षेत्र केन्द्रित बजेट आएको बताए। 

‘यो बजेट विनियोजनले आर्थिक अनुशासनलाई पालना गरेको देखिँदैन। मन्त्रीज्यू र सरकारका कारण संघीयता र व्यवस्था माथि धेरै टिका-टिप्पणी भइरहेको छ। कथनीमा एउटा कुरा गर्ने संघीयताप्रति असाध्यै धेरै प्रतिबद्धता भएको जस्तो देखिने र व्यवहारमा त्यसको उल्टो हुने। यो मात्र होइन विगतका सरकार र मन्त्रिमण्डलमा बस्ने पात्रहरूको कारणले सुशासन खलबलिएको छ, संघीयता र व्यवस्थामाथि प्रश्न उठेको स्थिति छ। सुधार गर्न कोही तयार छैन, खाली बोलीमात्रै राखिएको छ।’ 

यस्तै, सांसद पौडेलले अघिल्लो वर्ष भन्दा यसपालि भौतिक पूर्वाधार मन्त्रालयमा १० अर्ब बजेट बढेर आएको उल्लेख गर्दै राष्ट्रिय आवश्यकता भन्दा विपरीत बजेट खर्च हुने प्रवृत्तिले पूर्वाधार विकास आर्थिक विकाससँग नजोडिएको टिप्पणी गरे। 

पौडेलले भने, ‘अहिले जुन-जुन मन्त्रालयको बजेट विनियोजनबारे छलफल गरेका छौं सबैमा चालु खर्च बढेको अवस्था छ। राष्ट्रिय आवश्यकता के छ, विनियोजन कसरी भइरहेको छ, बजेट विनियोजनले भारतीय पर्यटक स्थलमार्गबाट ज्यादा आउँछन् कि चिनियाँ पर्यटकहरू सजिलो गरी आउने बाटो बनाउन हामी लागिराखेका छौ? कृषि उत्पादन बजारसम्म पुर्याउनका निम्ति हामीले बाटो बनाउन खोजिरहेका छौं कि पूर्वाधार विकास र आर्थिक विकाससँग कहाँनिर जोडिएको छ? आर्थिक विकाससँग काँही कतै जोडिएकै छैन।’

उनले शक्तिको आधारमा बजेट आएको र संघीयता विरोधी बजेट मात्रै २० प्रतिशत आएको दाबी गरे। 

असार ३, २०८१ मंगलबार १४:५०:४३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।