'टीकापुर घटना कसले गरायो हामीलाई होइन लाल आयोगलाई सोध्नुस्, मान्छेको नाम भन्नुपर्छ भने भनिदिन्छौं'

काठमाडौं : नागरिक उन्मुक्ति पार्टीका संस्थापक अध्यक्ष रेशमलाल चौधरीले टीकापुर घटनामा जबर्जस्ती थारूहरूलाई दोषी बनाइएको भन्दै उनीहरुलाई राज्यले उचित क्षतिपूर्ति दिएर माफी माग्नुपर्ने बताएका छन्।

काठमाडौंमा बुधबार नेपाल समाजवादी पार्टीको स्थापना दिवस कार्यक्रममा चौधरीले टीकापुर घटना गराउनेको नाम सार्वजनिक गर्ने बेला भइसकेको बताए। उनले गिरीशचन्द्र लाल नेतृत्वको आयोगमा उक्त विवरण रहेकोसमेत प्रष्ट पारे।

‘टीकापुर घटना कसले गरायो हामीलाई नसोध्नुस्। लाल आयोगलाई सोध्नुस्। मान्छेको नाम भन्नुपर्छ भने हामी भनिदिन्छौं। टीकापुरको अब नाम भन्ने बेला आएको छ,’ चौधरीले भने।

सँगै मञ्चमा आसीन गृहमन्त्री रवि लामिछानेलाई उल्लेख गर्दै चौधरीले भने, ‘टीकापुर घटनामा जबर्जस्ती दोषी बनाइएका थारूहरूलाई उचित क्षतिपूर्तिसहित राज्यले माफी माग्ने बन्दोबस्त गर्नुहोस्। हाम्रो के अपराध थियो? जसले घाइतेलाई रिक्सामा हालेर अस्पताल पुर्यायो, त्यो साढे ८ वर्ष जेलको कालकोठरीमा बस्नुपर्ने?’  

थारूलाई जोगाउनुपर्ने बताएका उनले नजिस्क्याउन चेतावनी दिँदै टीकापुर घटना घुसपैठ नभएर राज्यको सुनियोजित षड्यन्त्र भएको आरोप लगाए।

उनले जेलमा आफूलाई माओवादी नेताले नै त्यसको पुष्टि गरेको उल्लेख गर्दै भने,  ‘कृष्णबहादुर महराजीले जेलमा भन्नुभएको छ, ‘एक ठाउँमा युद्ध नगरे संविधान जारी हुँदैन थियो रेशमजी, ठाउँको खोजी हुँदै थियो टीकापुर भयो, अच्छा भयो।’

यस्तै, चौधरीले आफू र श्रीमती रञ्जिता श्रेष्ठ बीचको सम्बन्धमासमेत फाटो ल्याउन प्रधानमन्त्री पुष्पकमल दाहाल लागेको भन्दै उनलाई गीतको मोडल बनाएर खेलाउन मन लागेको भन्दै कटाक्ष गरे।  

‘दुई–चार महिनादेखि हाम्रो घरमा आगो लगाइदिए यिनीहरुले। लोग्ने–स्वास्नीको बीचमा फाटो ल्याउन लाग्ने राजनीतिक दलले देशको विकास गर्लान्? कस्तो नैतिकता, हाम्रो प्रधानमन्त्रीको बडा फुर्सद। प्रधानमन्त्रीलाई गीतको मोडल बनाएर खेलाउन मन लागेको छ मलाई,’ चौधरीले भने।  

 चौधरीले साढे १० हजार जनप्रतिनिधि र १ लाख ३९ हजार थारुहरु जम्मा भएको नागरिक उन्मुक्ति पार्टीको महाधिवेशनलाई निर्वाचन आयोगले अवैध ठहर गर्नु दुःखद भएको गुनासो गरे। 

‘महाधिवेशन नै नगर्ने पार्टीहरू वैध, पुसको कठ्याङ्ग्रिने जाडोमा नतिजाहरु आएर गरेको महाधिवेशन अवैध?’ उनले प्रश्न गरे। 

जेठ ३०, २०८१ बुधबार १७:४१:११ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।