नौ वर्षपछि फिल्म खेल्न नेपाल फर्किए अभिनेता राजवल्लभ

काठमाडौँ : नेपाली दर्शकमाझ प्रिय हुँदाहुँदै अमेरिका भासिए नायक राजवल्लभ कोइराला। फिल्म ‘हाइवे टु धम्पुस’मा काम गर्न अमेरिका पुगेका उनी नेपाल फर्किएनन्। उतै बसे।

कोइराला अमेरिकातिरै बस्नुको कारण आर्थिकभन्दा उनको निजी जीवनको आरोह अवरोह बढी कारक रहेको चर्चा बेलाबखत भइरहन्छ। उनी राजबल्लभ अहिले फिल्ममा अभिनय गर्न नेपाल फर्किएका छन्।

उनी, आइतबार बिहान नेपाल आउनुको कारण हो फिल्म ‘एक्टर’। फिल्म एक्टरको पहिलो चरणको छायाङ्कन सकिइसकेको छ। दोस्रो चरणको छायाङ्कन सोमबारबाट सुरु हुँदैछ।

उनी फिल्मको दोस्रो चरणको छायाङ्कनमा सहभागी हुन नेपाल आएका हुन्। फिल्ममा मुख्य नायक प्रदीप खड्का र नायिकामा आना शर्मा र दिव्या रायमाझी छन्।

राजन भुसालको निर्देशनमा थमन कुमार भण्डारीको लगानी रहने फिल्मको प्रदर्शन मिति तिहारलाई तोकिएको छ। अदृत फिल्मस् र मोती फिल्मस्को ब्यानरमा निर्माण भइरहेको यो फिल्ममा एनिस भुसाल सह–निर्माताको रूपमा छन्। 

जेठ २०, २०८१ आइतबार २२:१३:१३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।