‘द पोएट आइडल सिजन २’ को उपाधि सिक्किमका सिमियोनलाई
काठमाडौं : ‘द पोएट आइडल सिजन २’ को उपाधि सिक्किमका सिमियोन सुकिता राईले जितेका छन्।
शनिबार राति अबेर सम्पन्न फिनालेमा अन्य तीन प्रतिस्पर्धीलाई उछिन्दै उनले उपाधि जितेका हुन्।
उपाधिसँगै उनले नगद १० लाख, एभरेष्ट फिल्म कलेजबाट एक वर्षको स्नातक अध्ययनको छात्रवृत्ति, कथालयसँग पुस्तकको सम्झौता, उत्पला क्याफेको तर्फबाट एक लाखको गिफ्ट भौचर हात पारेका छन्।
त्यस्तै ग्राण्ड फिनालेमा धादिङकी कवयित्री डा.मुस्कान पोखरेल, धनगढीका कवि मोहित जोशी, इलामका कवि विजय लुइँटेलले पनि ट्रफी र अन्य सुविधाहरू प्राप्त गरेका छन्।
टेलिभिजन रियालिटी शो ‘द पोएट आइडल’ सिजन २ माघ २९ गतेदेखि हिमालय टिभीमा प्रसारण हुँदै आएको थियो। ३१ एपिसोडमा फाइनल भएको यो रियालिटी शो पहिलो जस्तो चर्चामा रहन सकेन।
यो एपिसोडलाई युटुबमा हेर्ने हो भने एक लाख दर्शकले पनि हेरेका छैनन्। केकी अधिकारीलाई जज राख्दा जति चर्चा भयो, अन्त्यमा फिनालेमा पुगेको कसैले पत्तै पाएनन्।
अमन प्रताप अधिकारी निर्देशक र दिव्यदेव पन्त प्रस्तोता रहेको कार्यक्रमका निर्णयकमा विप्लव प्रतिक, अनुप बराल, उपेन्द्र सुब्बा र केकी अधिकारी हुन्। पहिलो संस्करणको ‘द पोएट आइडल’को विजेता पनि सिक्किमकै कवि निलम गुरुङ बनेका थिए।
जेठ १४, २०८१ सोमबार ०९:५२:५७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
