'सहकारी ठगी प्रकरणमा सरकारले विपक्षलाई पेल्न खोजे कांग्रेस सहेर बस्दैन'

काठमाडौं : नेपाली कांग्रेसका नेता कृष्ण प्रसाद सिटौलाले सरकारले संसदमा कांग्रेसले उठाएको सहकारीको एजेण्डामा पेलेर जान खोजे कांग्रेस सहेर नबस्ने चेतावनी दिएका छन्।

आइतबार संघीय गणतन्त्र शासनसम्बन्धी संवाद कार्यक्रममा नेता सिटौलाले सरकारको पेलेर जान चाहने प्रवृतिको विरोध गरे। 

उनले कांग्रेस आफ्नो मागमा नडगमगाउने भन्दै सरकारले प्रतिपक्षको आवाज नसुने जस्तोसुकै चुनौतीको सामना गर्न कांग्रेस तयार रहेको बताए। 
 
‘सरकारले जनताको हितमा काम गर्नुपर्छ। प्रतिपक्षले जनताको आवाज निरन्तर उठाउनुपर्छ। प्रतिपक्षले कुरा उठाएन भने प्रतिपक्ष सिध्दियो। सरकारले जनहितमा काम गरेन भने सरकार सिध्दियो’ उनले भने, ‘म दाबाको साथ भन्छु, प्रतिपक्षमा कांग्रेस मात्रै नभएर अन्य पार्टीले पनि साथ दिएका छन्। प्रतिपक्षले संसदमा जनताको आवाज बुलन्द गरेको छ। यसलाई सरकारले छिटै गम्भीरतापूर्वक लिन ढिलाई गरेको छ। सरकार यसमा पेलेरै जान खोज्छ भने हामी त्यो चुनौतीको सामना गर्न तयार छौ।’ 

सरकारले सहकारी प्रकरणमा पेलेर जान खोजे कांग्रेसले नसहने भन्दै कडा रुपमा नेता सिटैलाले भने, ‘सरकार यही ढंगले जाने सोचमा छ भने कांग्रेस त्यसको लागी तयार छ। कांग्रेस सहेर बस्न सक्दैन। हामीले आफूमाथि अन्याय भएर होइन जनतामाथि अन्याय भएर कुरा उठाएको हो।’ 

जेठ १३, २०८१ आइतबार २०:२५:०९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।