करियर ओरालो लागेपछि अन्जु पन्तलाई पनि मिडिया खोज्नुपर्ने अवस्था आएको हो ?
काठमाडौं : गायिका अन्जु पन्तका लागि अमेरिका पानी पँधेरो हो। उनी कतिबेला अमेरिका पुग्छिन् त कतिबेला नेपाल फर्किन्छिन् पत्तै हुँदैन। नेपाली स्रोतालाई मात्रै होइन, संगीतकर्मीलाई पनि थाहा हुँदैन। दोस्रो विवाहपछि उनको अमेरिका बसाई लामै समय हुन्छ। उनका श्रीमान थीर कोइराला उतै बसोबास गर्ने भएकाले उनको नेपाल आउजाउ चलिरहन्छ।
उनी नेपाल भन्दा बढि समय अमेरिकामा बिताउन थालेपछि उनी पलायन भएको चर्चा चल्दै आएको छ। पछिल्लो पुस्ताका गायिका समिक्षा अधिकारी,रचना रिमाल,बेनिशा पौडेल,एलिना चौहान लगायतले फिल्ममा स्वर दिन थालेपछि उनको व्यवस्ता समेत घटेको थियो। एकथरीले अन्जुलाई पछिल्लो पुस्ताका गायिकाहरुले पलायन हुने अवस्थामा पुर्याएको आँकलन समेत गर्न थालेका थिए।
तर, उनी आफू पलायन नभएको दाबी गर्छिन्। मिडियामा समेत कम आउन रुचाउने अन्जु आइतबार दिउँसो अनामनगरमा आफ्नै गीतको भिडियो रिलिज कार्यक्रममा भेटिइन्।
सञ्चारकर्मीले तपाई पलायन भएको चर्चा चलिरहेको छ नि, अब अमेरिका नै बस्ने हो भन्ने प्रश्न गरेका थिए। उनले हाँस्दै आफू पलायन नभएको र कार्यक्रमका लागि अमेरिका आउजाउ भइरहेको जवाफ फर्काइन्।
उनी भन्छिन्,‘सबैजनाले मलाई प्रश्न गर्नु भएको छ। म पलायन भएको छैन। कार्यक्रमका लागि अमेरिका जाउआउ चलिरहेको हो।’
उनको कुरामा त्यति सत्यता भने छैन। किनभने उनी केहि दिनमा नै फेरि अमेरिका जाने तयारीमा छिन्। उनी अमेरिका जानुअघि मिडियासँग केही कुराकानी राखेर अमेरिका हुँइकिने सोचमा देखिन्छिन्। उनले एक युटुब च्यानलका लागि अन्तरवार्ता दिएपछि भन्दै गइन्,‘मलाई नेपाल आएको कुरा संगीतकर्मीले समेत थाहा पाएनन्। सामाजिक सञ्जालमा हेर्दैनन् कि के हो?’
हुन त अन्जुका पछिल्लो समय त्यति गीतहरू चलेका छैनन्। उनका गीतहरू राम्रा भए पनि स्रोतासम्म पुग्न सकेका छैनन्। सीमित मात्रामा गीत रेकर्ड गर्दै आएकी अन्जुका गीत रेडियो तथा टेलिजिभनमा समेत नयाँ भन्दा पुरानै गीत बज्ने गरेका छन्। यसमा उनी नयाँ गीतहरू पनि बजाउन चाहान्छिन् तर उनी यसमा कुनै आइडिया नभएको कुरा गर्दै थिइन्।
यतिका वर्ष गायनमा एकछत्र राज गरेकी उनी आफै आफ्ना गीतहरू कसरी रेडियो टेलिभिजनमा पुर्याउन सकिन्छ भनेर सञ्चारकर्मीसँग नै सुझाव मागिरहेकी थिइन्। नेपाल भन्दा बढि अमेरिकामा बसोबास गर्न थालेपछि अन्जु पन्त मात्र होइन, अब पछिल्लो समयकी व्यस्त गायिका एलिना चौहानलाई पनि स्रोता दर्शकले चिन्लान् भन्न सकिदैन। किनभने उनी पनि अष्ट्रेलिया पलायन भइसकेकी छन्।
जेठ १३, २०८१ आइतबार १८:४४:०३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
