कांग्रेस संसदीय दलको बैठक आज बस्दै, संसद् बैठकबारे छलफल हुने
काठमाडौं : प्रमुख प्रतिपक्षी नेपाली कांग्रेस संसदीय दलको बैठक आज बस्दैछ।
दलको बैठकअघि सभापति एवं दलका नेता शेरबहादुर देउवाले संसदीय दल कार्यसमितिको बैठक राखेका छन्।
संसदीय दल कार्यसमितिको बैठक बिहान ८ बजे र संसदीय दलको बैठक बिहान ९ बजे सिंहदरबारस्थित दलको कार्यालयमा बस्न लागेको हो।
सहकारी ठगी प्रकरणमा उपप्रधानमन्त्री एवम् गृहमन्त्री रवि लामिछानेमाथि लागेको आरोपका सम्बन्धमा छानबिन गर्न संसदीय समिति गठन गर्नुपर्ने अडान राख्दै आएको कांग्रेसले संसद्का दुवै सदनमा अवरोध गर्दै आएको छ।
तर, मंगलबार सरकारले आगामी आर्थिक वर्षका लागि नीति तथा कार्यक्रम प्रस्तुत गर्ने कार्यक्रम भएकाले सोका लागि संसद्मा अवरोध गर्ने वा नगर्ने भन्ने विषयमा दलको बैठकले निर्णय लिनेछ।
प्रमुख सचेतक रमेश लेखकले नीति तथा कार्यक्रममा कांग्रेसले अवरोध गर्ने वा नगर्ने भन्ने विषयमा बैठकले निर्णय लिने बताए।
छानबिन समिति गठन गर्नुपर्ने मागमा प्रधानमन्त्री पुष्पकमल दाहाल सकारात्मक भए पनि त्यसबारे सत्तारुढ दल एमाले र राष्ट्रिय स्वतन्त्र पार्टीले भने अडान राखेका छन्।
कांग्रेसले बजेट अधिवेशनको पहिलो बैठक पूर्ण रूपमा अवरोध गरेको थियो।
जेठ १, २०८१ मंगलबार ०७:५९:१७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
